Maxkamadda Sare Ee Kenya oo ayiday guusha madaxtinimada ee William Ruto

Nairobi. 5 September, 2022 (QJ)- Maxkamadda sare ee waddanka Kenya ayaa xukuntay in William Ruto si sax ah loogu doortay madaxweynaha, iyadoo meesha ka saartay dacwado dhowr ah oo la doonayay in lagu baabi’iyo natiijadii doorashadii 9-kii August.

Raila Odinga, ayaa ku eedeeyay guddiga doorashada in ay sameeyeen  wax isdaba marin wayn, oo ay ka mid tahay faragelinta foomamka natiijada doorashada.

Madaxweynaha la doortay Ruto ayaa helay 50.5% codadkii la dhiibtay doorashadii sida adag loogu loolamay.

Toddobaadka soo socda ayaa loo dhaarin doonaa xilka madaxweynaha shanaad ee dalkaas.

Siddeeddii codsi ee ka dhanka ahaa doorashooyinka waa la laalay. Maxkamaddu waxay heshay qaar ku salaysan dukumeenti been abuur ah, sida uu sheegay madaxa caddaalada Martha Koome.

Xukunka maxkamadda ayaa soo afjaraya murankii doorashada kaas oo soo billowday kaddib markii lasoo gabagabeeyay doorashooyinkii bishii hore dhacday.