AlShabaab oo gubtay booyado shidaal oo loo waday saldhiga Maraykanka ee Ballidoogle

Muqdisho 4 September, 2022 (QJ)- Kooxda alShabaab ayaa sheegtay inay gubeen saddex gaadhi oo booyad ah oo shidaal u siday garoonka diyaaradaha ee deegaanka Balli-doogle, halkaas oo ay saldhig ciidan ku leeyihiin Maraykanku isla markaana lagu tababaro fadhina u ah ciidamada Danab ee Maraykanku tababaro.

Afhayeenka howlgallada kooxda Alshabaab, Cabdicasiis Abuu Muscab, ayaa sheegay inay gaadiidkan ku weerareen iyagoo marayay deegaanka Xaawo Cabdi ee  u dhaxeeya Muqdisho iyo Afgooye.

Abuu Muscab wuxuu sheegay inay ka baxsatay hal booyad oo dhinaca magaalada Muqdisho u carartay, waa sida uu hadalka u dhigaye.

Muuqaallo lagasoo qaaday goobta ayaa muujinayay gaadiidkan oo gubanaya oo wadada dhinaceeda yaalla. Saraakiil dowladda ka  tirsan ayaa sheegay inay jiraan dhaawacyo soo gaadhay darawaliintii gaadiidkan.

Lama oga wax dhimasho ah. Waxayse saraakiishu sheegeen Alshabaab in dhowr madfac ku dhufteen gaadiidka sahayda u waday xerada Balli-Doogle.

Alshabaab ayaa marar badan wadada isku xidha Muqdisho iyo Shabeellada hoose ka geysta weeraro “ku dhufoo ka dhaqaaq ah”. Waxayna inta badan eegtaan ciidamada ku safra jidkaan oo ah meelaha ugu halista badan.