Taliye Dabagale oo ka guuray xaafadda New Hargeisa iyo meesha uu degay

Hargeysa 13 August, 2022 (QJ)- Taliyaha ciidamada booliska ee Somaliland ayaa ka guuray xaafadda New Hargeisa oo beeshiisu Hargeysa ka degaan, isagoo hal maalin ka maqnaa imika xaafaddan oo dhacda bariga magaalada.

Dabagale ayaa xaaskiisa iyo caruurtiisa u raray galbeedka magaalada oo ah xaafadda madaxweynaha deegaanka u ah, iyadoo dhammaan qoyskiisa aanay waxba ka hadhin.

Goobjoogayaal ayaa Qurbejoog u sheegay in gawaadhi koontiidharo lasoo saaray lagu raray qoyska Dabagale goor habeenimo ah, kadib cabsi ay wajaheen.

Dadka deegaanka ee xaafadda degen ayaa ka cadhaysan habdhaqanka taliyaha booliska Somaliland, oo eedyamo u jeediya masuuliyiinta beeshiisa ee mucaaradka ah.

Somaliland waxa ka jira cabsi xoogan oo madaxda xukuumadda iyo mucaaradka haysata taas oo ku aadan dilal la sheegay in ay qorshaysan yihiin oo labada dhinacba ka cabsi qabaan, gaar ahaan mucaaradka oo shirqoolo ka baqaya.