Khasaaraha ka Dhashay Sadex Shil Baabuur oo Maanta ka Dhacay Deegaamo Somaliland ah

Hargaysa 07. March 2016 (SDN/QJ):- Sadex Shil oo Baabuur ah Isla markaana Sababay Khasaare isugu Jira Dhimasho iyo Dhaawac ayaa Maanta ka Kala Dhacay Deegaamadda Kala Baydh,Arabsiyo iyo Duleedka Magaaladda Berbera.
Sida ay Ku Waramayso Shabakada Qurbejoog oo Xidhiidho kala duwan la samaysay Deegaanada ay Shilalkani ka dhaceen ayaa sheegaysa in Shilka Kowaad uu ka dhacay magaalada Kalabaydh ,Shilkan gaadhi Waxa uu sababay Dhaawaca Toban Qof oo Laba ka Mid ah Xaaladoodu Culus tahay kuwaas oo loo soo qaaday dhanka Cisbitaalka Guud ee Caasimada hargaysa Shilkan ayaa dhacay ka dib markii gaadhi noociisu yahay Waaraad uu jiidhay bar kaantarool ka dibna uu wadada ka baxay oo uu duqeeyay meherad aaggaa ku taalay .

Gaadhigan oo sidey xamul raashin ah ayaa dhinac u jiifsadey .

Sidoo kale Wararka Shilalka ee Naga Soo Gaadhaya Gobolka Saaxil ayaa Sheegaya in Gaadhi Nooca Raaxada ahi uu ku dhacay Goolad ku taala Wershada Sibidhka ee Duleedka Magaalada Berbera halkaas oo uu ku Geeriyooday Hal Ruux isla markaana ay ku dhaawacmeen Laba Qof oo kale.

Geesta kale Gaadhi nooca Xamuulka ah oo Siday Khudrad siday ayaa ku qalibmay deegaanka Arabsiyo kadib markii uu waddada ka baxay Waxaanu sababay dhaawaca Hal ruux oo haweenay ah oo xaaladeedu culus tahay.

Dabayaaqadii Bishii Febarwery ayay ahayd Markii Shilkii ugu Naxdinta Badnaa uu ka dhacay inta u dhaxaysa Deegaanada Kala Baydh iyo Gebilay kaas oo Sababay Dhimashada 14 Ruux Iyo 8 Ruux oo dhaawac ah kadib markii ay isku dhaceen laba baabuur oo kala ahaa Nooha iyo Land Cruser.