Mineapolis:Wiil Soomali ah Oo Toogasho Ku Dilay Gabadh Soomaaliyeed iyo Booliska Oo Raacdo Ugu Jira Soo Qabashadiisa
Minneapolis:April,21,2015(SDN/QJ)-Wiil Soomaali ah, ayaa la sheegayaa inuu Madaxa ka toogtay Gabadh Somali-American ah oo ku nooleyd dalka Mareykanka, waxana raacdo loogu jiraa sidii wiilkaas loosoo qaban lahaa.
Gabadhan Soomaaliyeed oo lagu magacaabi jirey Ayaan Cabdi Cabdulaahi (AU) oo 21 sano jir ah ayaa waxaa la sheegay inuu wiil Soomaaliyeed oo lagu magacaabo Axmed Cabdiraxiim Cabdi oo 17 sano jir ah uu madaxa ka toogtey gabadhaas Soomaaliyeed, Booliiska oo ay soo gaadhey fariin ah inay rasaas ay ka dhacday guri ku yaala magaalada ayaa markii ay goobtaas gaadheen waxay kula kulmeen meydka gabadhaas Soomaaliyeed oo madaxa laga toogtey iyadoona isla goobtaas ku geeriyootey.
Wiilkan oo ay booliiska magaalada Minneapolis ee gobolka Minnesota si aad iyo aad ah ay u baadi goobayaan ayaa waxaa la sheegay inuu booliiska magaaladaas uu qof caan ah ka yahay agtooda maadaama horey loogu qabtey fal dambiyeedyo fara badan oo uu galay, Wiilkan Soomaaliga ah ayaa waxay booliisku ay ku sifeeyeen nin khatar ah oo laga fili karo dhibaato baaxad weyn.
Wiilkan Soomaaliga ah ayaa waxaa kale oo ay booliisku ay ku tilmaameen inuu yahay mid labada gacmood ku leh waxa loo yaqaana taatuuga ama qoralaada jidhka lagu xardho iyadoona ay labada gacmood uga kala qoran yihiin erayada kala ah BIG iyo DOG oo macnaheedu yahay Eeygii Weynaa.
Ugu dambeyntiina iyadoo booliiska magaalada Minneapolis ee gobolka Minnesta ay baadi goob ugu jiraa wiilkaaas Soomaaliyeed ee lagu soo eedeeyey inuu dilay gabadhaaas Soomaalida ayaa hooyada dhashay gabadhaas oo lagu magacaabo Xaliimo Caalim waxay sheegtay inay aad iyo aad ay uga naxday geerida gabadheeda iyadoo sidoo kalena sheegtay inay gabadheeda ay ahayd qof dadaala mar walba islamarkaana ku taamaysay horumar inay gaadho mustaqbalka.
Hooyadan ayaa sidoo kale sheegtay inay aqoon u lahayn wiilka loo raadinaayo dilka gabadheeda islamarkaana aanay garaneynin waxa geeyey gabadheeda gurigaas lagu dlay.
SDN/QJ
Contact@somalidiasporanews.com