Xogo Dheeri ah Oo kasoo Baxaya Weerarkii Garisa iyo Tiro Dhimasho iyo Dhaawac ah Oo La Xaqiijiyey
Garisa:April,02,2015(SDN/QJ)-Wararka ku saabsan Weerar saaka aroortii hore lagu qaaday Jaamacadda Garisa University College, ayaa soo kordhaya, waxana soo baxaya inay dhimasho iyo dhaawacyo jiraan.
Wararku waxa ay sheegayaan in ugu yaraan laba kamid ahaa ciidankii ilaalada jaamacaddu halkaas ku geeriyoodeen, halka ay jiraan tiro kale oo dhaawacyo ah oo ay ku jiraan Ardaydii jaamacadda iyo saraakiil katirsanaa ciidamada ammaanka.
Sida ay sheegayaan warar kooban oo ciidamada ammaanka Kenya laga helayo, kooxda Hubaysan ee Goobtaas xoogga ku gashay, ayaa tiradooda lagu sheegay saddex ilaa afar qof, waxana ay bilaabeen inay toogtaan ciidankii Jaamacadda ilaalinayey.
Warku ma xaqiijin halka ay ku dambeeyeen Maleeshiyadii weerarkaas geysatay, waxase soconaya gurmad ay ciidamada ammaanku samaynayaan, kaas oo la doonayo in lagu badbaadiyo ardayda iyo macallimiinta Jaamacadaas ku sugan ee weerarku qabsaday.
SDN/QJ