Khasaaraha Ka Dhashay Dagaal Galabta Deegaanka Dhahar ku dhex maray Ciidamada Somaliland iyo Kuwa Punt land

Dhahar 25.Sep 2014 (SDN/QJ)- Gelinkii danbe ee maanta ayaa waxa magaalada Dhahar ee Sanaag-bari dagaal ku dhexmaay ciidammada qaranka Somaliland iyo Ciidanka  Maammul-goboleedka Soomaaliyeed Ee Puntland Waxana inta la hubo dhinaca Somaliland ka dhaawacmay hal askari halka dhinaca Puntland uu ka Dhintay Hal Askari halka la sheegayo in dhaawacyo badani jiraan

 

“Waxa yimid nin  wasiir-kuxigeen ah waxanu  doonayeen inay meesha (Dhahar)  Golle Deegan ka dhisaan arrintaasna Somaliland dagaal ayay ka xigtaa waana laga hortegey”. Sidaas waxa yidhi Badhasaabka Gobolka Sanaag Maxamuud Cali Saleebaan (Ramaax) oo aannu arrintan wax ka weydiinney.

 

Isagoo ka hadlaya khasaaaha ka dhashay dagaalkaasna wuxu yidhi “Xagga Somaliland hal askari ayaa dhaawacmay xaggoodana (Puntland) hal Askari ayaa dhintay  dhaawacyo badan ayaa la sheegayaa ilaa imminkana rasaas googoos ah ayaa weli dhacaysa”.

 

Dhinaca kalena wararka laga helayo degaankaas ayaa sheegaya in dagaalku ahaa mid culus oo bilaabmay gelinkii danbe ee maanta islamarkaasna gabbalku u dhacay welina dhawaqa rasaasta oo googoos ah la maqlayo.

Dhahar SDN/QJ

contact@qurbejoog.com