Ciidanka Punt land ee Difaaca kaga Jira Buuralayda Gal Gala oo Khasaare Dhimasho iyo Dhaawac soo gaadhay

Boosaaso 19.Aug 2014 (SDN/QJ)-Saraakiil ka tirsan ciidanka difaaca Puntland ee jiida Galgala ayaa la soo weriyay in Khasaare  dhimasho iyo dhaawac lihii uu ku yimid kaas oo  uu sababay mid ka mid ah gadiidka dagaalka ee ciidanku leeyihiin oo ku dhacay duleedka magaalada Bosaso.

Gaari nooca 4F-ka oo ay leeyihiin ciidamada Puntland ee saldhigyada ku leh Jiida Galgala ayaa Xalay fiidnimadii ku rogmaday buundo jiifta  u dhaxaysa tuulooyinka Laag iyo Karin xilli uu ka tagay Laag, uuna kusii jeeday Saldhig ciidanka oo ku yaala Togga Sugure ee Difaaca Galgala.

Wuxuuna sababay shilka gaariga ciidanka dhimashada 3 Askari iyo Dhaawac 8 kale oo hadda lagu dabiibayo Isbitaalka guud ee magaalada Bosaso islamarkaana  ay ku jiraan dhaawacyo xaaladoodu liidato.

Shilalka gadiidka ciidanka Puntland ayaa soo badanayay bilihii lasoo dhaafey, Iyadoona ay ku dhinteen 4 askari iyo dhaawaca 12 kale shil gaari oo ka dhacay bartamaha magaalada Garowe 26 July 2014 .

Halka  4 Askari ku dhimatay mid ka mid ah gadiidka ciidanka Madaxtooyada Puntland oo ku rogmaday deegaanka Qayaasame 09 June 2014.

Inkastoo dhacdooyinkan ay yihiin kuwo ku yimid qadarta Alle misana waa kuwo dadka qaar dhaliilo ugu jeedinayaan wadayaasha gadiidka  oo lagu eedeynayo xawaare sarre in ay wadada ugu adeegsadaan.

Boosaaso SDN/QJ

contact@qurbejoog.com