Ra’iisul Wasaare Cabdiwali Sheekh Axmed oo dib ugu soo laabtay dalk
Mogadishu, June 12, 2014(SDN/QJ)—Ra’iisul Wasaaraha Xukuumadda Federaalka Soomaaliya Mudane Cabdiweli Sheekh Axmed ayaa dib ugu soo laabtay dalka kadib markii uu magaaladda Addis Ababa ee dalka Ethiopia uga qeyb galay shirweynaha 26-AAD ee aan caadiga ahayn ee Urur Goboleedka IGAD, waxaana kusoo dhaweeyay garoonka diyaaradaha ee magaalada Muqdisho xubno ka tirsan labada golle ee dawladda.
Ra’iisul Wasaaraha oo garoonka kula hadlay warbaahinta ayaa ka warbixiyay shirkii IGAD iyo go’aanadii kasoo baxay kulankii looga hadlayey xallinta iyo heshiisiinta mucaaradka iyo dawladda Suudaanta Koonfureed, isagoo xusay in arrintaasi meel wanaagsan la gaarsiiiyey isla markaana masuuliyiinta IGAD ugu hambalyeeyanayaan heshiiska ay gaareen.
“Waxaan magaalada Addis Ababa uga qeyb galnay shir aan caadi ahayn oo isugu yimaadeen madaxda Urur gobolleedka IGAD, waxaana looga hadlay saddex arrimood oo khuseeya koonfurta Suudaan kuwaas oo kala ah joojinta colaada, gaarsiinta gurmad deg deg ah dadkii colaaduhu saameeyeen iyo sidii loo sii wadi lahaa dib-u-heshiisiin dhinacyada” ayuu yiri Ra’iisul Wasaaraha Soomaaliya Cabdiwali Sheekh Axmed oo dhinaca kale tilmaamay heshiiska ay gaareen dhinacyada Koonfurta Sudan in uu yahay tusaalooyin xal looga gaarayo mushkiladaha inta badan kusoo noq-noqda qaarada Afrika.
Dhanka kale RW Cabdiwali ayaa sheegay in magaalada Addis Ababa uu wada hadallo kula yeeshay dhiggiisa dalka Ethiopia Hailemariam Dessalegn iyo madax kale ayna ka wada hadleen arrimo quseeya labada dal sida iskaashiga ammaanka, la dagaallanka argagixisada iyo arrimo kale oo muhiim ah. “Dalka Ethiopia waxaan kula kulanay Ra’iisul wasaaraha Ethiopia iyo qaar kamid ah Golahiisa wasiirada, waxaan ka wada hadalnay arrimaha dalka iyo tan gobolka, sida Koonfurta Suudaan waxa ka socda, horumarka xagga amniga ee Soomaaliya ku talaabsatay, maadaama uu yahay guddoonka IGAD, Dawladda Ethiopia waxaan leenahay iskaashi iyo xiriir qoto dheer. Waxaan uga mahad celinaynaa dalka Ethiopia sida wanaagsan oo uu mar walba noogu garab taagan yahay dadaalka aan ugu jirno xasilinta iyo nabadeeynta Soomaliya” Ayuu yiri Ra’iisul Wasaare Cabdiwali Sheekh Axmed.
Masuuliyiinta dalalka gobolka ayaa si weyn u taageeray heshiis ay magaalada Addis Ababa ku gaareen madaxda Koonfurta Sudan oo bilihii u danbeeyay ay ka soconayeen dhibaatooyin ka dhashay khilaaf siyaasadeed.
SDN/QJ-Muqdisho