Dagaal Culus Oo Xalay Buuralayda Gal-gala ku dhex Maray Al-shabaab iyo Ciidanka Daraawiishta Puntland
Gal-Gala:May,08,2014(SDN/QJ)-Buuralayda Gal-gala waxa Habeenkii xalay ka dhacay Dagaal muddo socday oo u dhexeeyey Kooxaha Al-shabaab oo halkaas Saldhigyo ku leh iyo Ciidamada Daraawiishta Maamulka Puntland.
Inkastoo ay adagtahay in Goobtaas warar sax ah laga Helo, haddana wararka na soo gaadhaya ayaa sheegay in dhimasho iyo dhaawacba ka dhasheen isku dhacaas labada dhinac dhex maray.
Sida ay sheegayaan wararka dagaalkan oo ahaa kii ugu cuslaa mudooyinkan ka dhaca buuraha Galgala, ayaa yimid markii dagaalyahano ka tirsan Shabaab ay weerareen fadhiisin ay ciidamada Puntland ku lahaayeen halkaas.
Wararka ayaa sheegaya in labada dhinac ay isu adeegsadeen hubka cul culus, kaasoo laga maqlayay duleedyada magaalada Boosaaso ee Gobolka Bari.
Saraakiil ka tirsan Maamulka Puntland oo la hadlay warbaahinta ayaa sheegay in shan ka tirsan dagaalyahanada Shabaab ay ku dileen dagaalka, halka saddex kale ay nolosha ku qabteen.
Ma jirto wax war ah oo ka soo baxay dhanka Al-Shabaab oo mudooyinkii u dambeeyay waday weeraro ay ku qaadayeen fadhiisimada Ciidamada Puntland ku leeyihii Buuraha Galgala iyo duleedyada Boosaaso.
Ciidanka Puntland ee warbaahinta la hadlay ma ay sheegin inta uu le’eg yahay khasaaraha iyaga ka soo gaadhay dagaalka, waxase ay ku adkaysteen inay dhinacii kale khasaare Gaadhsiiyeen.
SDN/QJ
Contact@somalidiasporanews.com