Nuxurka Socdaal uu Wasiirka Caafimaadka Somaliland ku Tagay Maanta Magaalada Laascaanood

Laascaanood 04.Feb 2014 (SDN)- Wasiirka Wasaaradda Caafimaadka ee JSL Dr Saleebaan Ciise Axmed (Xaglo Toosiye) iyo wefti uu hogaaminayo ayaa maanta socdaal shaqo ku tegay  Gobolka Sool iyadoo qaybaha dadweynaha ee Gobolkaasi ay si balaadhan ugu soo dhoweeyeen  Magaalada Laascaanood.

Wasiirka Caafimaadka oo kormeerkiisu qayb ka yahay socdaaladii uu ku marayey gobolada dalka oo ah socdaalo ku saabsan xog ogaal u noqoshada xaaladda caafimaad ee Gobolada dalka ayaa lugtiisii ugu horaysay ee socdaalkiisa Gobolka Sool waxa uu ku tegay degmada Yagoori, isagoo booqday xarunta MCH-ka ee xanaanada hooyada iyo dhalaanka ee magaaladaasi isla markaana la kulmay waxgaradka iyo maamulka degmadaasi, intaa ka dibna waxa uu u sii gudbay deegaanka adhi-cadeeye oo uu  dhagax dhigay MCH cusub oo halkaasi laga hirgelin doono,

Wasiirka wasaarada caafimaadka Dr saleebaan Ciise iyo weftigiisu markii ay gaadheen xarunta gobolka Sool ee laascaanood waxaa soo dhoweeyey boqolaal dadweyne ah oo si balaadhan oo kaga hor yimid duleedka magaalada, isagoo markiiba gudo galay hawlihii uu u socday.

Wasiirku waxa uu kormeer ku tegay cisbitaalka dhexe ee Magaalada laascaanood oo uu qol-qol u galay, halka sidoo kalena uu booqday Mac-had-ka barashada aqoonta caafimaadka oo dhismihiisu ka socdo magaaladaasi.

Weriye Barkhad cumar Axmed oo ka tirsan wakaaladda wararka Somaliland ee Solna kuna sugan magaalada laascaanood ayaa ku soo warramay in Kulan balaadhan oo ay goobjoog ka ahaayeen maamulka heer gobol iyo heer degmo ee Gobolka sool oo wasiirku kula yeeshay  shaqaalaha caafimaadka hoolka shirarka ee cisbitaalka dhexe ee magaalada laascaanood uu warbixino kaga dhegaystay bahda caafimaadka, iyagoo ku bogaadiyey wasiirka caafimaadka dadaaladiisa ku aaddan habsami u socodsiinta hawlaha caafimaad ee guud ahaan Gobolada Somaliland

Dhankiisana wasiirka wasaaradda caafimaadka JSL Dr saleebaan Ciise Axmed waxa uu ku wargeliyey bahda caafimaadka ee Gobolkaasi inuu dhowaan samayn doono guddi caafimaad oo ka hawlgeli doonta horumarinta caafimaadka ee Gobolka sool.

Laascaanood SDN.

Qurbejoog.com