Aas Qaran oo loo sameeyay Guule ha u Naxariistee Marxuun Axmed Maxamed Aadan Qaybe {DAAWO MUUQAALO}

Hargaysa 27.Nov 2013 (SDN)- Waxaa maanta magaalada Hargaysa ee Caasimada Somaliland aas Qaran loogu sameeyay Rabi naxariistiisii Janno ha ugu deeqee Marxuun Axmed Maxamed Aadan Qaybe oo ahaa Gudoomiyihii hore ee Golaha Wakiilada Somaliland oo Shalay Subax ku Geeriyooday Hargaysa .

Aaska Marxuunka Waxa ka Qayb galay Madaxweynaha Somaliland Mudane Axmed Maxamed Maxamud Siilaanyo,Hogaanada Golayaasha Qaranka,Xisbiyada Siyaasada,Madax dhaqameedyo,Siyaasiyiin,iyo dadweyne kale oo Tiro badan

Marxuum Axmed Maxamed Aadan Qaybe oo siyaasadda Soomaalida safka hore kaga soo jiray tan iyo sanadkii 1960-kii. Taariikdiisa oo balaadhnayd  hadii aynu dulmarno

Sanadkii 1930-kii waxa uu ku dhex dhashay saldhig millateri oo lagu magacaabi jiray ‘Royal Naval Station’, oo ku yaallay Xaafadda Khoor-masar, ee magaalada Cadan, oo ahayd  xeradii aabbahii ka shaqayn jiray.

Yaraantiisii waxa uu ku kacaamay magaalada Cadan illaa uu kaga baxay dugsiga sare, waxa uu muddo kooban ka shaqeeyey radio hargeysa, sanadihii dhamaadkii afartameeyadii isagoo dib ugu noqday dhanka magaalada Cadan,

, Sanadihii Kontomeeyadii waxa uu ku soo noqday hargaysa isagoo ka shaqeeyey xafiiskii DC-ga,

1956-dii waxa uu noqday Xoghayihii Dawladda hoose ee Degmada Berbera, markaa ka dibna waxa uu deeq waxbarasho ka helay jaamacad ku taalla magaalada london ,markii uu soo dhamaystay jaamacadda waxa uu noqday xoghaha baarlamaanka Somaliland, isagoo sidoo kalena xoghaye u ahaa gudidii dalacaadda iyo waxbarashada dibadda.

Janaury 1960-kii ayuu London dib ugu noqday si uu xeer hoosaadka baarlamaanka ingiriiska u soo barto.

Intii u dhexaysay sanadihii 1960-1985 Waxa uu dalkii la isku odhan jiray Somalia safiir u ahaa Muddo 25 sanadood ah isagoo ka soo shaqeeyey dalalka Midowgii Soofiyeeti, Maraykanka, Ingiriiska iyo Qaramada Midoobay, muddo shan sanadood ahna waxa uu ahaa xoghayahii joogtada ahaa ee wasaaraddii Arimaha Dibadda ee dalkii Somalia , muddo lix bilood ahna waxa uu ahaa wasiirka arimaha Dibadda.

Sanadkii 1997-dii oo uu ku soo noqday Somaliland waxa uu muddo sided sanadood ahaa Gudoomiyahii Golaha wakiilada ee JSL. Isagoo door lama illaawaan ah ku lahaa diyaarintii Dastuurka Somaliland oo uu ka mid yahay sadexda mas’uul eek u saxiixan Buuga dastuurka qaranka.

INNAA LILLAAHI WA INNAA ILAYHI RAAJICUUN

Hargaysa SDN.

Qurbejoog.com