Xulka Mexico oo 5-1 Ku Asqeysiiyey Xulka New Zealand(World Cup Play/off) By Jaahuur.
Mexico-Azteca Stadium-Nov-14-2013-(SDN)-Asxaabtay qormadeena ciyaaraha waxaynu maanta ku jibaaxaynaa ciyaar aad u xiisa badneyd oo dhexmartey xulka Mexico iyo xulka New Zealand kana tirsaneyd isreeb-reebka koobka kubadda cagta ee aduunka kana dhici doona Brazil 2014.
Ciyaartan oo lugtii hore ahayd (First Leg) kana dhacdey Azteca Stadium ee dalka Mexico ayaa waxaa ka soo qeybgaley dadweyne iyo taageerayaasha labada dhinac oo kor u dhaafey 60,000.
Haddaba ciyaartan oo reer Mexico aad u sugayeen ayaa ku bilaabantey weerar badan oo ay labada xul isku qaadeen daqiiqaddii 32-aad goolkii ugu horeeyey waxaa Mexico u saxeexay Aquilar kii labaadna waxaa madaxa u raaciyey Jimenez, qeybtii hore ee ciyaarta Mexico – 2 New Zealand – 0.
Qeybtii dambe ee ciyaarta New Zealand oo rajeyneysey iney ka dabatimaado ayaa la waayey meel ay jaan iyo cidhi dhigtey,markii Peralta u raaciyey gookii 3-aad iyo kii 4-aadba kii qalbi jabkana waxaa ku sagootiyey Marquez,goolka kaliya ee New Zealand waxaa la daala dhacay James.
Akhyaartay lugta labaad (Second Leg) oo ka dhici doonta Wellington Arbacada soo socota bal aynu eegno New Zealand iney ku cadho burburto Mexico.
W/qorey Jaahuur
SDN