Dagaal ka dhacay Degmada Baraawe oo ay Alshabaab isku laysay
Baraawe 30.Aug 2013 (SDN)- Wararka naga soo gaaraya degmada Barawe ee gobolka Shabellaha Hoose ayaa waxay sheegayaan in dagaal uu ku dhexmaray halkaasi ciidamo kawada tirsan Al shabaab.
Dagaalka waxa uu ka dambeeyey ama ku lug leeyahay khilaaf bilihii dambe udhaxeeyey mas’uuliyiinta sare ee Al shabaab taasi oo kala shaki yimid kadib rasaas la isweydaarsaday maanta oo jimco ah.
Warar soo baxay ayaa ku waramaya in 4 Askari ay ku dhinteen dagaalkaasi maanta ka dhacay Barawe iyadoo 6 kalena ay ku dhaawacmeen welina la dareemayo dhufeysyo ay iskugu jiraan dhinacyadii dagaalamay.
Ka hadalka arimahaan qof jooga Baraawe aad bay ugu adag tahay isagoo ka baqanaya in loo dhibaateeyo hadii uu wax ka yiraahdo xiisadaha ka jira waayihii dambe Barawe.
Ugu dambeyntii bishii June ee sanadkaan ayaa waxa lagu dilay isla gudaha Barawe labo sargaal oo muhiim u ahaa Xarakada Al shabaab kuwaasi oo kala ahaa Ibraahim Xaaji Jamac (Afghaan) iyo C/xamiid Xaashi Col-haye (Macalin Burhaan) loo yaqaanay.
Baraawe SDN.