Xoogagga Al-shabaab Oo Saaka Weerar Qorshaysa kula Wareegay Saldhig AMISOM Ku lahayd Deegaanka Leego
Leego:June,26,2015(SDN/QJ)-Wararka saaka laga helay deegaanka leego ee Gobolka Sh/Hoose, ayaa sheegaya in Xarakada Ururka Al Shabaab ay weerar saf ballaadhan ah ku qaadeen xarunta ay AMISOM ku lahaayeen halkaas.
Weerarka, ayaa ku bilowday gaadhi walxaha qarxa laga soo buuxiyay oo lagu dhuftay afaafka hore ee Xeradaasi, waxaana xigay ciidan xoogan oo dagaal toos ah ku soo qaaday Ciidamadii Amisom ee Xerada ku sugnaa.
Labada dhinac, ayaa muddo saacad ku dhow ku dagaalamaayay halkaasi, waxaana la soo sheegayaa in Ciidanka Midowga Afrika xoog loogala wareegay gacan ku haynta Xeradaasi.
Leego oo ka tirsan Degmada Wanlaweyn, ayaa waxaa la soo sheegayaa inay ku dhaqaaqeen ciidan xoogan oo ka kala tirsan Ciidanka Xooga Dalka iyo Xoogaga Midowga Afrika ee Somaliya. Si Shabaabka looga saaro halkaasi.
Sarkaal Ciidanka Militariga Somaliya ka tirsan, ayaa sheegay inay wadaan abaabul ka dhan ah Shabaabka ku soo duulay Deegaanka Leego.
Rasaas aan xooganayn, ayaa waxaa iminka laga maqlayaa Deegaanka Leego. Lama garanaayo inay Shabaabku isaga bixi doonaan iyo in kale, balse tani ayaa waxay walaac xoogani ku keentay dadka reer Leego.
Illaa iyo haatan lama garan khasaare sugan oo weerarkaasi geystay, waxase la sheegayaa in dhinaca Ciidamada AMISOM khasaaruhu u badan yahay.
Wixii warar ah ee weerarkaas kasoo kordha wararkayaga dambe ayaanu idinkula soo socod siin doonaa insha allah.
SDN/QJ