Wiil Uu Dhalay Madaxweyne Siilaanyo oo La Sheegay Inuu Talooyin Maangal Ah U Soo Jeediyey Aabihii, Xilli Wasiir Xirsi Safar Olole Ugu Baxayo U.K

Hargeysa:20-Oct-2013 (SDN)- Wasiirka wasaaradda Madaxtooyadda Somaliland Xirsi Cali X. Xasan ayaa la sheegay in uu safar olole qaadhaan ah ugu bixi doono wadanka Ingiriiska, halkaas oo uu ku maqnaan doono Muddo Bil ah.

 Wasiir Xirsi ayaa la filayaa socdaalkiisu inuu la xidhiidho qaadhaanka Jidka Ceerigaabo oo uu doonayo in uu ku soo dhiirigaliyo sidii ay uga qayb qaadan lahaayeen Dadka Qurbajooga ahi, isagoo kulamo ku qaban doona magaalooyinka ay degan yihiin dadka Reer Somaliland.

 

Safarka Wasiirka Madaxtooyadda Somaliland ayaa ku soo beegmaya  xilli loollan adagi ka taagan yahay shirweynaha Xisbiga Kulmiye oo la sheegayo in khilaaf wayni ka taagan yahay xubno qaban qaabo ah oo ay wasiirrada iyo Guddoonka Xisbigu kala qaybsadeen kuwaas oo la isku haysto.

 

Kulan aan illaa hada laga haynin Xog dheeraad ah ayaa Xukuumadda iyo Hogaanka Kulmiye ku dhex maray Qasriga Madaxtooyadda xalay iyadoo uu dib u dhacay Liis lagu waday   Jimcihii  lagu dhawaaqo, balse la filayo  inuu soo baxo Maanta oo Axad ah.

Ilo wareedyo u dhuun daloola safarka wasiir Xirsi ayaa sheegaya in uu ku soo beegmayo xilli la hadal hayo in isku-shaandhayn uu ka mid yahay madaxweyne Axmed Siilaanyo samayn doono maalmaha soo socda, kaasoo aad loo hadal hayo in Xirsi loo bedeli doono wasaaradda Hawlaha Guud.

Bedelaada wasiir Xirsi ayaa loo aanaynayaa soo jeedin Madaxweynaha Somaliland kaga timi qaar ka mid ah qoyskiisa kuwaas oo kula taliyay in jagada wasaaradda Madaxtooyadda cid kale loo magacaabo si uu taageero ugu helo doorashada Madaxtinimada ee soo socota.

Soo jeedintan cida ugu badan ee ay ka soo baxday isla markaana wali danaynaysa in ay sidaas u dhacdo ayaa la saadaalinayaa in tahay Wiilka Kulmiye Axmed Siilaanyo la yidhaahdo oo la sheegayo in uu Aabihii kula kulmay Dalka Turkiga isla markaana Hargeysa u joogo qorshihiisaas.

Sidoo kale, Cali Maxamed warancade ayaa la filayaa in seeftu qaadato ama meel kale loo bedelo halka la hadal hayo in Rag Wasiiro sugayay aanay fursad u heli doonin halka ilo wareedyo u dhuun daloola qorshaha Isku shaandhayntu hadal hayaan wasaaradda madaxtooyadda in la gayn doono guddoomiyihii ururkii Rays Xasan Gaafaadhi.

Cali warancade oo muddo kooban joogay jagada wasaaradda Arrimaha gudaha Somaliland ayaa lagu dhaliilayaa in hawlihii loo igmaday uu kaga mashquulay saaxiibadiisii ay isku xirfada NSS-ta ahaayeen isla markaana ay ka soo wada talin jireen xisbigii UDUB ee ay Kulmiye sida wayn isaga soo horjeedeen, kuwaas oo Gurigiisa ka dhigtay Marfish ay ku Ururaan.

Ilo wareedyo u dhuun daloola Xukuumadda ayaa sheegaya in isbedelo kala duwani ku soo fool leeyihiin Xukuumadda iyo Xisbiga Kulmiye, kuwaas oo aan la saadaalin karayn Natiijada ka soo bixi doonta.

 

Madaxweynaha oo haatan sida uu wax u wado marka la eego ay ka muuqato inuu doonayo inuu mar kale isu oo taago madaxtinada dalka, ayaa haddii uu meesha ka saaro wasiirkiisa awoodda badan ee madaxtoyada waxa dhici doonta inuu heli doono taageero badan oo ka timaadda dhinaca Bulshada, maadaama dadku si aad uga biyo diidsan yihiin wasiir xirsi oo awoodo xad-dhaaf ah haatan ku goolaaftayamay.

 

S.D.N

Contact@somalidiasporanews.com