Wiil La Xidid ah Qoyska Madaxda ka Ah Somaliland Oo Burco la Soo Galay Raxan ka mid ah Gaadiidkii, Ilaaladii iyo Dirawaliintii Madaxweyne Siilaanyo
Burco:27-March-2014(SDN-Waxa Habeenkii Xalay Magaalada Burco ee Xarunta Gobolka Togdheer Soo Gaadhay Wafti Wasiirro ah oo Wato Wiilka uu Madaxweyne Siilaanyo Soddogga u yahay ee Baashe Cumar Cawil (Moorgan) Loo Yaqaano, iyadoo Halkaas Marayaan Raxan ka mid ah Gaadiidki Madaxtooyada iyo waliba Ilaalada Gaarka u ah Madaxweynah Qaranku.
Xubnaha Wasiirrada ee Waftigan qaybta ka ah ayaa wax aka mid ah Wasiirrada wasaaraha Madaxtooyada Caafimaadka, Dibu-dejinta iyo Saraakiil kale kale oo si gaar ah ugu xidhan Madaxtooyada.
Sida ay Sheegayaan wararka ay Qurbejoog.com Helaysaa, waxa Waftigan Ujeeddadooda Lagu Sheegay sidii u Deegaanka War-cibraan oo ah Halka uu Baashe Moorgan ka soo Jeedo Uga Soo Dhagax Dhigi lahaayeen Mashaariic in Muddo ahba ay isku Maandhaafsanaayeen Madaxtooyada iyo Wiilka Soddogga loo yahay oo si weyn ugu dhegsan in Wax qabad sedbursiimo u muuqda loo sameeyo Deegaanka uu ka soo Jeedo.
Baashe Moorgan ayaa inta Badan ah Shakhsiyada Awood Muuqata ku leh Nidaamka Dawladeed ee Madaxweyne Siilaanyo, taas oo ay ugu wacantahay Marwada Qaranka oo Talooyin Badan weydiisa inkastoo aanu wax xil ah ka Haynin Xukuumaddan Haatan jirta.
Markii ay soo gaadheen Magaalada Burco weftigu ayaa la arkaayay isagoo wata gaadhigii ugu horeeyay waftigaas oo ah Baabuurtii khaaska ahayd ee madaxwaynaha, isla markaan ay saaranyihiin xubno ka mida ilaalada gaarka ah ee Madaxweyne Siilaanyo, waddona darawalkii labaad ee madaxwaynuhu.
Arrimaha filan waaga ku Noqday Ciddii la kulantay Waftigan ayaa ah inay Goobta Marayaan Gaadiidkii Madaxweynaha iyo waliba Qaarka mid ah Dirawallada Khaaska u ah Madaxweyne Siilaanyo, iyadoo Qaar ka mid ah Shacabka Togdheerna Uba qaateen inuu Madaxweyne Siilaanyo Mar labaad dib ugu soo Noqday Magaalada Burco markii ay Gaadiidkiisii arkeen.
Baashe Moorgan oo ah Nin Qurbejoog ah ayaanay inta Badan Shaqada uu Madaxtooyada ka Hayo marka laga Reebo Xididtinimada Qoyska Caynkaanka dalka haya qeexnayn, waxana la Arkaa inta Badan marka Garoomada Diyaaradaha la Joogo, inkastoo aanu isagu Jeclayn in La Arko isagoo Madaxweyna Ku Dhaw.
Marar Badan ayaa ehellada iyo qaraabada kale ee Madaxweyne Siilaanyo ay talo ku soo Jeediyeen in Wiilkaas Xididka la ah reer Barbar looga Saaro Siyaasadda Dalka maadaama aanay Arrintaasi Dhaqan ahaan Wanaagsanayn, taas oo uu Madaxweyne Siilaanyo Garawshiiyo ka Bixiyey, balse waxa Si cad isu Hor Taagtay Arrintaas Marwada Koowaad ee Qaranka oo u sheegtay inay Jiraan Arrimo aan Looga Maarmayn oo uu Madaxtooyada u qabtaa.
Baashe Moorgan Qudhiisu ma jecla inuu ka dheeraada Siyaasadda Dalka goobaha lagu jaangoynayo, waxana Uu Taas Taageero kaga Haystaa Marwo Aamina Waris, balse Hadalhaynta Dadka Shacabka ah ayaa ku Badan Wiilka Soddogga loo Yahay ee Haatan isku Darsaday ilaaladii, dirawaliintii iyo Gaadiidkii Madaxweynaha Qaranka U Gaarka ahaa.
S.D.N