Wiil aad u Yar oo Ku Nool Magaalada Gaalkacayo oo soo Bandhigay Farshaxanka Diyaarad uu Gacantiisa ku Sameeyay SAWIRO

Gaalkacyo 14.Aug 2016 (SDN/QJ):- Shirwaynaha Dhallinyarada Gobolka Mudug oo ka dhacay degmada Gaalkacyo maalinimadii Jimcaha ahayd ee 12-ka bishaan Agoosto ayaa waxaa lagu soo bandhigay farshaxan diyaaradeed oo aad u qurux badan taas oo gacantiisa wiil dhallinyaro ah. Wiilkaan yar soo bandhigay farshaxan diyaaradeed oo loo wada riyaaqaya.

 

Guddoomiyaha degmada Gaalkacyo Maxamuud Yasin Tumey oo wiilka yar shirka ku casumay ayaa aad u bogaadiyay hal abuurka waxa uuna ballan qaaday inuu la garab taagan yahay dhiirri galin inta uu awoodo isagoo sidoo kale wiilka yar ku boorriyay inuu kor usii qaado xirfadiisa. Sidoo kale dhammaan dadkii shirka kazoo qayb galay ayaa bogaadiyay hal abuurka wiilka yar.

 

Cabdullahi Cali Xuseen waa wiil dhallinyaro ah oo 16 sano jir ah wuxu ku nool yahay Deegaanka Bacaadweyn waxa uuna ku jiraa heerka waxbarashada dugsiga dhexe.

 

Waqtiyadan dambe ayaa waxaa soo badanaya hal abuurada farsamada gacanta ee ay samaynayaan dhallinyarada Soomaaliyeed. Bulshada Soomaaliyeed ayaa ah bulsho taariikh ahaan lagu yaqaano hal abuurada kala duwan inkastoo ay arrintaani hoos u dhacday muddadii waddanka uu burburka galay. Dowladda, ganacsatada, bulshada rayidka, hay’adaha waxbarashada iyo hay’adaha Caalamiga ahaa looga baahan yahay inay u sameeyaan dhiiri galin dhallinyarada hal abuurka leh ee uu ka mid yahay Cabdullahi.