“Waxay keeni kartaa hanaankii dimuqraadiyadeed ee Somaliland ka hanno-qaaday inay fashilmaan” Gudoomiyaha Garabka Haweenka Waddani ee Waqooyiga America

Dubai 18.July 2016 (SDN/QJ):-  Guddoomiyaha Garabka Haweenka Xisbiga WADDANI ee Waqooyi America ahna Safiirka wareega Marwo Suhuur Xasan Abiib,ayaa waxay ka digtay dib-u-dhac markale ku yimaada doorashooyinka Madaxweynanimada oo toddobaadadii ugu danbeeyey la hadal-hayay, isla markaana waxay ka warantay safar shaqo oo ay ku joogto Magaalada Abu Dubai.

 

Marwo Suhuur Xasan Abiib ayaa waxay sheegtay inay Magaalada Abu Dubai ay joogto dardargelinta hawlaha Xisbiga WADDANI, waxaanay tidhi “Waxaan socdaal ku jooga Magaalada Abu Dubai ee isu-taga Imaaraadka Carabta, u-jeedada socdaalkayguna waa dardargelinta hawlaha Xisbiga WADDANI, haddii ILAAHAY yidhaahdo waxaan maalmaha soo socda iman doona Caasimada Somaliland ee Hargeysa…”

“Maalmihii u danbeeyey waxa Warbaahinta Somaliland qoreysay inay dib u dhacayaan doorashooyinka Madaxweynanimada iyo Golaha Wakiillada oo la filayo inay dalka ka qabsoomaan horaanta sanadka 2017-ka,waxaan ka digayaa inay mar labaad dib-u-dhacdo doorashooyinku, haddii ay dib-u-dhacaan waxay dhaawac Siyaasadeed ku keenaysaa Somaliland…”Ayey tidhi Marwo Suhuur Xasan Abiib oo caawa u waramaysay Shabakada Wararka ee Hayaannews.

 

“Waxay keeni kartaa hanaankii dimuqraadiyadeed ee Somaliland ka hanno-qaaday inay fashilmaan,…Waxaanay Somaliland gelin doontaa gadoon Siyaasadeed oo dibadda”Ayey tidhi Marwo Suhuur Xasan Abiib.