Wax ka bedel lagu samaynayo Nidaamka uu u Shaqaynayo Madaarka Cigaal International Airpote

Hargaysa 04.Jan 2015 (SDN/QJ)- Maamulaha Madaarka Diyaaraddaha Cigaal   International Airpot ee Magaaladda   Hargeysa Maxamed Yuusuf Ismaaciil ayaa sheegay inay wax ka badaleen hanaankii loo qaadi jiray Cashuuraha laga qaado dadka madaarada ka dhoofaya ama ka soo degaya. Qorshahan oo hirgalaya sanadka cusub ee 2015-ka ayaa lagu mideeyay Lacagaha Madaarka lagaga qaadi jiray Madaarka islamarkaana hal mar laga wada qaadi doono lacagihii qofka marka uu dhoofayo iyo marka uu soo degayaba laga qaadi jiray.

 Maamulaha Madaarka Cigaal Maxamed Yuusuf Ismaaciil oo maanta warbaahinta la hadlay, waxa hadaladiisii ka mid ahaa “Waxaanu guud ahaan Macaamiisha adeegsata Madaarka ku wargalinaynaa in Nidaamkii Cashuur qaadista, hadday noqoto Cashuurtii Wasaaradda Maaliyaddu qaadi jirtay iyo hadday noqoto Cashuurtii Wasaaradda Duulistu qaadi jirtayba in nidaamkii wax laga bedelay, iyadoo aan wax cashuur kordhin ah la samayn.

Maamulaha Madaarku , waxa uu intaas ku daray “Waxa la samayn jiray in Qofku markuu dhoofayana Lacag laga qaado marka uu soo degayana Lacag laga qaado,markaa waxay Xukumaddu samaysay in halkii Wasaaradda Maaliyaddu qaadi jirtay 30 Dollar oo soo galitaan ah iyo 30 dollar oo bixi taan ah in qofka hal mar laga wada qaado oo marka uu soo galayo uun 60 Dollar laga qaado. Waxa kale oo jirtay Lacago wasaaradda Duulistu qaado hadday tahay 3 Dolar oo soo galis ah iyo 3 Dollar oo bixid ah iyo 10 Dollar oo Goluhu ansixiyay Lacagahaasna waxaa dadka lagaga qaadayaa Xafiisyada Dadku Fiisaha ka soo goosanayaan.” Ayuu yidhi Maamulaha Madaarku.