Wasiirka Arrimaha Dibadda Somaliland oo Ka Hadlay War ay Dhibsatay Jamhuuriyadda Jabuuti oo ka Soo Yeedhay Wakiilka Somaliland ee Imaaraadka & Bedqabka Caafimaad ee Madaxweyne Siilaanyo

Hargaysa 12. July 2017 (SDN/QJ):- Wasiirka arrimaha dibadda iyo iskaashiga caalamiga ah Dr. Sacad Cali Shire, ayaa ka hadlay hadal la sheegay in laga soo xigtay wakiilka Somaliland ee Imaaraadka Carabta Baashe Cawil oo nuxurkiisu ahaa inay Djibouti ka dambaysay cabashooyin uu madaxweynaha Somaliya Mr. Farmaajo u gudbiyay Sucuudiga oo ka dhan ahaa saldhiga Milatari ee Imaaraadka ee Berbera.

Baashe Cawil oo u waramay warbaahinta Newsweek Middle East wuxuu sheegay inay Djibouti doonayso inay kooto ku haysato saldhigyada Milatari ee shisheeye ee gobalka Geeska Afrika.

Dawladda Djibouti ayaa la sheegay inay dhibsatay dhawaaqaas, waxaanay cabasho ka dhan ah hadalkaas u gudbisay wefti ka socda xukuumadda Somaliland oo hadda ku sugan.

 

Hase yeeshee Wasiir Sacad Cali Shire oo u waramay wargeyska Geeska Afrika ayaa sheegay inaan la hayn cadayn ku saabsan in Baashe Cawil hadalkaas yidhi balse la hayo in laga soo weriyay, waxaanu sheegay inay Djibouti raali ka tahay horumar kasta oo ay Somaliland gaadho. Wasiir Sacad, waxa kale oo uu sheegay in xaaladda caafimaad ee Madaxweyne Siilaanyo wanaagsantahay. Waraysigaas uu Geeska Afrika la yeeshay wasiir Sacad Cali Shire, wuxuu u dhacay sidan:

 

Safar baad ku tagteen dalka Jabuuti, waxaad la kulanteen Madaxweynaha dalka Jabuuti, ee waxyaabaha ugu muhiimsan ee aad ka wada hadasheen maxaa ka mid ah?

 

Waa dhab oo safar baanu ku tagnay dalka Jabuuti, si fiicana waa na loo qaabilay, waxaana la kulanay Madaxweynaha Jabuuti, waxaana ka wada hadalanay sidii labad dal iskaga kaashan lahaayeen dhinaca Dhaqaalaha, dhinaca Amaanka, dhinaca Siyaasada, iyo wax walba oo aynu iska kaashan kari karno ama iska caawin karno, waxaynu nahay Jabuuti dal aynu jaar nahay, oo aynu walaalo nahay,si fiicana wey noo soo dhaweeyeen, waxaana ku rajo weynahay inay dalkeena dhawaan yimadaan Wefti culus oo ka socda Dawladda Jabuuti.

 

Majalada Newsweek Middleeast toddobaadkan waxay baahisay wareysi uu bixiyey Wakiilka Somaliland ee Imaraadku Baashe Cawil, kaas oo sheegay in aanay Jabuuti raali ka ahayn saldhiga Milatari ee Berbera, kootana ay doonayso inay ku haysto saldhigyada Milatari ee Mandaqada Geeska Afrika, xilli aad idinku booqasho ku tageen dalka Jabuuti, markaas maxay kula tahay?

 

Ilaa hadda war xaqiiqo ah oo ku saabsan warbixinta la baahiyey ma hayno, waxaynu haynaa oo qudha in warbixintaas laga wariyey Wakiilka Somaliland ee Imaraadka Baashe, balse aniga ilama ah inuu sidaas odhanayo. Ta’ kale Dalka Jabuuti, waa dal aynu jaar nahay, oo ma filayo inay horumarkeena diidan yihiin cadawna ku yihiin, inay ku farxaan mooye, wixii horumar ah ee inoo soo kordha ama Dekad ha noqoto ama Saldhig Milatari ha noqoto, inay Dawladda iyo Dadka reer Jabuuti inagu bogaadiyaan mooye marnaba ma muuqato inay ka xumaanayaan.

 

Labadii heshiis ee Dekadda Iyo Saldhiga milatari ee Imaraadka, labadaba waxa ku jiray Mashruuca Bebera Coori-door ee maxay kala yihiin labadan heshiis?

 

Waa dhab, oo heshiiskii Dekadda Berbera ee Shirkada DP Wolrd wuu ku jiray, heshiiska Saldhigana wuu ku jiray, balse waa laba heshiis oo kala duwan, heshiis wuxuu ahaa in la sameeyo Waddada Berbera ilaa Wajaale iyo Madaar cusub oo caalamiya, heshiiska kalena wuxuu ahaa heshiis farsamo, markaas sidaas ayey ku kala duwan yihiin.

 

Muddooyinkii ugu dambeeyey Madaxweynaha Somaliya arimaha Somaliland aad buu uga hadlaayey, waxaanu ugu dambayntii sheegay in Shacabka Soomaaliyeed ka tashan doonaan wixii laga yeelayo Saldhiga Milatari ee Berbera, markaas sidee ayaad u aragta hadalkiisa?

 

Farmaajo inuu xaq-dhawro, oo uu ixtiraamo Somaliland ayaa la gudboon, balse sidii loo doortayba waxa muuqda inuu aad uga hadlayo Somaliland, waxaana cad inuu daan-daansi wado, ee Farmaajo waxaan leeyahay cago dhigo, oo malaa waxaad doonaysa inay Somaliland iyo Somaliya isku dhacaan ee ina kala badbaadi, oo jaarnimada ixtiraam, adiga oo halkii laguu doortay ka talin la’a, oo amaankeeda iyo xasiloonideeda sugi kari la’a faraha ha la soo gelin Somaliland, hore ayaanu ugu hungoownay Somaliya ee dib uma soo socono, ee ha daalin, Dekadda Berbera iyo Saldhiga Milatari iyo wax walba oo ku saabsan arimaha Somaliland waxba lagaa su’aali maayo, cidina waxba ka weydiin mayso.

 

Somaliland iyo Somaliya oo dhawr jeer wada hadlay hakad baa ku yimid markii uu Xasan Sheekh Somaliya Madaxweynaha ka ahaa, Farmaajana aad buu ugu soo celceliyaa wada hadalada, ma kula tahay in wada hadaladaas la bilaabayo?

 

Siday wax noqon ALLE ayaa og, laakiin Farmaajo haddii uu doonayo inay wada hadaladii halkoodii ka sii socdaan waxa u sharaf ah inuu hadalada meel ka dhaca ah ee lidka ku ah wada hadalada uu joojiyo, ujeedada wada hadaladuna maaha sidii ay dib iskugu noqon lahaayeen Somaliland iyo Somaliya, ee waa sidii aanu u caddeyn lahayn cid walbana ugu qancin lahayn inay Somaliland markii horena ay ahayd Dal madax banaan, imikana ay tahay dal madax banaan, oo aanay u socon Somaliya inay mar dambe la midoowdo, waxaanu ka qoomamaynaa markii aanu isku darsanay, balse qadar bay ahayd, laakiin ALLE mahadii dib ayaanu ula soo noqonay xoriyadayadii.

 

Waxa la sheegaa inuu Madaxweynuhu xaalad caafimaad u joogo dalka Imaraadka, Xukuumadduna qarinayso inuu Madaxweynuhu halkaas xaalad caafimaad u joogo, markaas maxaa ka jira?

 

Wax walba ILLAAHAY gacantiisa ayey ku jiraan, haddii ay xanuun tahay iyo haddii ay caafimaad tahayba, balse waxa hubaal ah inuu Madaxweynuhu caafimaad qabo, ALLENA waxaan uga baryayaa  cimri dherer.

 

Safiirka Mareykanka ee Somaliland iyo Somaliya waa markii ugu horeeysay ee uu socdaal ku yimaado dalka Somaliland, ee ka waran socdaalkiisa?

 

Waa dhab oo waa markii ugu horeysay oo Safiir Mareykan ahi, oo dalkeena yimaado, waxaana xaqiiqo ah inuu aad ugu bogay hanaankeena horumarkeena iyo waliba xasiloonideena, iyo heerka aynu ka gaadhnay Dimuqraadiyada iyo heerka balaadhan ee aynu dhinaca kasta ka gaadhnay inagoo aan wali Beesha Caalamka ka helin Aqoonsi Caalamiya, waanu ina dhiirigeliyey.

 

Gobolada Maroodi-jeex iyo Togdheer ayey ka bilaamatay kaadh qaadashadii, waxaanad mooda inay wali gabaabis tahay, markaas maxaad dadka ku gubaabinaysa?

 

Qofku isaga ayaa xor ah, oo Xisbigu doono u codeyn kara, laakiin muhiimadu waxa weeye in kaadhka qof walba oo is diwaangeliyey uu qaato, si uu Doorashada u galo, mana haboona inuu dayaco fursad uu ku codeyn lahaa.