“Wasiir Maxamud Xaashow Saxaafaddu iyaddaa Ka Mujaahidsan, Shalay Waadigii Qoriga SNM Kala Baxsaday Ee Faqashta U Galay” Warsaxaafadeed Ururka SECJA

Hargaysa 11.Sep 2016 (SDN/QJ):- Ururka Suxufiyiinta Somaliland ee (SECJA) isagoo tixraacaya weedhihii iskugu jiray cago-juglaynta iyo han-jabaadda ee Wasiirka Madaxtooyadda Somaliland Md. Maxamuud Xaashi Cabdi Warbaahinta Madaxabanaan la bartilmaameedsaday.

Waxa uu marka hore ka xun yahay Ururka Suxufiyiinta Somaliland ee SECJA, weedhaha Digteeternimada tilmaamaya ee Wasiirku lasoo hor istaagay Shacab-weynaha Somaliland ee ka sugaayey inuu uga warbixiyo heshiiskii ay xubnaha uu kamid ahaa qaranka u metelaayeen, isla markaana Shirkadda Dp World kula soo galeen dalka Imaaraadka Carabta, kaasoonu Wasiirku shar iyo Khayr midna Bulshada uga sheegin waxa uu ku saabsana iyo Faa’iidada uu leeyahay.

Waxa’se ayaan darro weyn ah in Wasiirka Madaxtooyaddu Md. Maxamuud Xaashi uu bulshada maqashiiyo hadallo naxli iyo cuqdi xambaarsan, kuwaasoo aanay Siyaasiyiinta Xilalka hayaa isticmaalin 25-kii Sanadood ee Somaliland jirtay. Weedhaha Wasiirka afkiisa kasoo baxaayey waxay tilmaamayaan in Somaliland ka guurtay Nidaamkii Dimuquraadiga ahaa ee Dastuur keena ku qornaa, hadalka wasiirku waxa uu tilmaamaya in Xukuumadda uu ka tirsan yahay damacsan tahay cidhib-tirka Xoriyatul-qawlka iyo madaxbanaanidiisa, iyo sidoo kale, xoriyadda shacabka Somaliland ee ah inay fikirkooda si xor ah oo aanay habrasho ku jirin uga dhiibtaan xaaladdaha dalka ka taagan.

 

Haddaba, Wasiirka Madaxtooyadda Maxamuud Xaashi Cabdi, waxa uu Ururka Saxaafadda Somaliland ee Secja si cad ugu sheegayaa in Dastuurka Somaliland u yaala uu Saxaafadda u Damaanad qaaday inay Bulshada usoo gudbiso dhacdooyinka maalin-laha ah ee dalka ka dhacaaya, kuwaasoo iskugu jira soo tebinta Wararka Xukuumadda waxbaadkeeda iyo dhaliisheeda, daba-galka Musuq-maasuga shaqsiyaadka Xilalka hayaa. Sida daraadeedna Saxaafadda dalku, iyadoo ku shaqaynaysaa Shurucda dalka aanay hanjabadiisa ku joojinayn shaqada mutadawacnimada ah ee ay u hayaan Shacabka Somaliland.

Wasiir Maxamuud Xaashi waxanu ku sheegaynaa Inay Saxaafadda Somaliland kaga lexo jeclo badan tahay dhismaha Qaranka Somaliland, dhisidiisa mooye dumintiisa kama shaqayso, wasiir ogow Saxaafadda dalku waxay si toos ah Toosh afar Xanjaar-leh ah shacabka ugu baahinaysaa maamul xumada iyo Musuq-maasuqa dalka ka jira, waxanay ku ifinaysaa adiga oo miidhan oo Mansabkii Qaranka uga faa’ideysanaaya danahaagga gaarka ah. Wasiir Maxamuudow shalay markaad mucaaridka ahayd ee aad Baarlamaanka dalka kamid ahayd, miyaad ilowday waxyaabihii qaranimada duminaayey ee aad Saxaafadda kusoo bandhigaysay, cidina aanay habeen keliya kugu xidhin, kugulana xisaab-tamin. Sidoo kale, Wasiir miyaad ilowday shalay Xisbiga Kulmiye ee aad ka faa’iday markuu Mucaaridka ahaa waxyaabihii uu baahin jiray iyo abaalkay Idiin gashay Saxaafaddu.

 

Gunti iyo gabo-gabadii, Saxaafadda Somaliland joojin mayso baahinta dhaliishada iyo ta Xukuumadda, sidoo kalena joojin mayso baahinta horumarka iyo dhismaha Qaranka Somaliland, waxa kaloo aad oggaata Wasiir dhaliisha Saxaafaddu qori dal lagu haysto maaha, ee waa qalin, qalinkuna waxa uu saxa khaladkaaga, waxana ku wanaagsan inaad ka garowdo Gunti xumaanta aad dalka ugu shaqaynayso oo aad saxdid khaladaadka maamul ee aad ku kacday, Wasiir Saxaafaddu cadow maha ee waa nasteex, tubta toosan kugu hagta, markaa waxaan kugu waaninaynaa inaanad u arag Cadow cunaha kaaga duuban. Sidoo kale, Wasiir ogow Saxaafaddu iyadda ayaa ka Mujaahidsan, shalay markii dib-u-xoraynta dalka duurka loogu jiray, waxaad kamid ahayd shaqsiyaadkii Qoriga SNM kala soo baxsaday ee Faqashta usoo galay ee weliba Sirtii SNM siiyey, xiligii uu Madaxweyne Siilaanyo inagu hoggaaminaayey halkankii SNM.

Alla mahad leh

Gudoomiye Ku-xigeenka Ururka Saxaafadda Somaliland ee Secja.

Axmed Muuse (Sakaaro).