Wasiir Burci oo ku Dhintay Weerarkii Hotelka Iyo R.W Cumar oo Cambaareeyey Falkii Argagixiso ee Hotel Naasa-Hablood1
Muqdisho 26.June 2016 (SDN/QJ):- Burci Maxamed Xamza, oo ahaa wasiiru-dowlaha arrimaha deegaanka ee xafiska RW Somalia ayaa ku dhintay weerarkii lagu qaaday shalay hotel Naasa Hablood ee magaalada Muqdisho.
Burci oo sidoo kale ahaa xildhibaan ka tirsan baarlamaanka Somalia ayaa maydkiisa laga soo saaray burburkii hotel Naasa Hablood1.
Tirada dadkii dadkii ku dhintay weerarkaasi ayaa gaadhay 20 qof.
Ururka al-Shabaab ayaa sheegtay in weerarkaasi ay iyagu ka danbeeyeen
Dhanka Kale Ra’iisul Wasaaraxa Xukuumada Fedaraalka ah ee Soomaaliya Mudane Cumar Cabdirashiid Cali Sharmaarke ayaa tacsi tiiraanyo leh u direy eheladii iyo qaraabadii muwaadiniintii lagu laayay qaraxii shalay ka dhacay Muqdisho, asagoo dhaleeceeyay falkaasna ku tilmamay mid arxan daro ah.
“Waxaan tacsi tiiraanyo leh u dirayaa ehelada iyo qaraabadii muwadiintii Soomaaliyeed ee lagu xasuuqay bartamaha Muqdisho. Si gaar ah waxaan tacsi ugu dirayaa ehellada Wasiiru dawlihii Bii’ada ee Xafiiskeyga oo weerarkaasi naftiisa ku waayeey. Falkaas argagixiso wuxuu ahaa mid banii’aadamnimada ka baxsan oo ay gaysteen kuwo arxan daran oo ka soo horjeeda nolosha iyo horumarka ummada Soomaaliyeed,” Ayuu yiri Ra’iisul Wasaaruhu.
Ra’iisul Wasaaraha ayaa sheegay in falkan ismiidaamintaa ee lala beegsadey Hotel Naasa-Hablood1 uusan hakin doonin habsami u socodka hawlaha dawladda iyo hannaanka loogu diyaar garoobayo dalka in ay ka qabsoomaan doorashooyin.
“Anoo aad uga murugaysan dhibka loo gaystay dadka rayidka ah waxaan ummadda u xaqiijinayaa in falkaas argagixiso uusan hakin doonin shaqadii aan u haynay dadkeena iyo dalkeena. Waxaana shacab weynaha u sheegayaa inaan u taaganahay difaacooda xili kasta aana xoojinayno amniga guud ahaan,” Ayuu yiri Ra’iisul Wasaraha.
Ra’iisul Wasaaraha ayaa muujiyay inuusan jirin dambi ummada Soomaaliyeed laga galo oo ka weyn gumaadka lagu hayo dadka rayidka ah ee aysan jirin wax ay galabsadeen iyo cid ay dambi ka galeen xili lagu guda jiro bisha Ramadaan.
–-DHAMAAD—