Wasaarada Qorsheynta oo maanta soo gunaanaday tababar ay shaqaalaha dawlada u qabatay
Hargeysa Mar 26,2012(SDN)-Agaasimaha guud ee wasaaradda qorshaynta qaranka MdC/rashiid Axmed ayaa Maanta u soo gabo gabeeyay aqoon isweydaarsi muddo 7 Cisho ah u socday hawlwadeeno ka kala tirsan wasaaradda iyo hay’adaha dawladda taas oo ka qabsoontay Xarunta Wasaaradda Qarshaynta Qaranka.
Agaasimaha qorshaynta qaranka Md C/rashiid Axmed ayaa mahadnaq u soo jeediyey madaxda hay’adda “FAO” ee soo agaasintay tababarkan oo ay qaadanayeen hawlwadeenada wasaaradaha iyo hay’adaha dawladda, waxaanu ka waramay tababarkan iyo ujeedadiisa oo uu ku tilmaamay tayaynta iyo kor u qaadida hawlaha wasaaraddaha iyo hay’adaha qaranka, ee dhinacyada xog ururinta, habaynta macluumaadka computer-ada si loo ilaaliyo loona kaydiyo xogaha wasaaraddaha dawlada .
Agaasimuhu waxa uu masuuliyiinta hay’adda “FAO” ka codsaday in tababarada noocan oo kale ah ay joogteeyaan, waxaanu intaas ku daray in Wasaarad ahaan ay xil iska saareen sidii aqoon isweydaarsi loogu samayn lahaa hawl wadeenada wasaaradaha qaranka si kor loogu qaado aqoonta habka xog ururinta ee hay’adda dawladda.
C/rashiid Axmed Agaasimaha Guud ee Wasaarada Qorshaynta Qaranku waxa uu kula dardaarmay hawlwadeenadii aqoon isweydaarsigan ka qayb qaatay in duruustii ay ka kasbadeen ay ku dabaqaan Xirfadooda shaqo. Madaxa xafiiska Hay’adda “FAO” ee Somaliland Md Maxamed Jaamac Gahayr ayaa mahadnaq ballaadhan u soo jeediyey masuuliyiinta wasaaradda qorshaynta qaranka iyo madaxda Hay’adda “FAO” ,isagoo intaa ku daray in tababarkani looga dan leeyahay kobcinta xog ururinta hay’adaha dawladda, waxaa kale oo Mas’uulkani amaana u soo jeediyey dhamaan shaqaalaha tababarka qaadanayey dadaalka ay la yimaadeen muddadii ay tababarka ku jireen.
Gabagabadii munaasibadda agaasimaha Guud ee wasaaradda qorshaynta qaranku waxa uu shahaadooyin guddoonsiiyey shaqaalihii tababarka qaadanayey.
SDN-Hargeysa
contact@somalidiasporanews.com