Warbixino ku saabsan Magaca iyo Sawirada askarigii Maraykanka looga dilay Somalia

Muqdisho 06. May 2017 (SDN/QJ):-Warbaahinta Maraykanka ayaa saacadihii la soo dhaafay warbixino kala duwan ka qoray askariguu ka tirsanaa ciidamada Maraykanka ee shalay lagu dilay Somalia.

Askarigan oo la oran jiray Kyle Milliken ayaa ahaa 38 jir ka tirsanaa ciidamada gaarka ah ee Maraykanka gaar ahaan qeybta Falmouth oo ka tirsan Maine.

Sida uu baahiyey Telefishinka ABC Kyle Milliken ayaa ka soo qeyb qaatay howlgalada ciidamada Maraykanku ka wadaan dalalka Ciraaq iyo Afghanistan,wuxuuna ku guuleystay bilado badan hase ahaatee ugu dambeyna shalay ayaa lagu dilay Somalia.

Kyle Milliken ayaa noqday askarigii ugu horeeyey Maraykan ah ee Somalia lagu dilo tan iyo sanadkii 1993-dii sida ay shaacisay waaxda gaashaandhiga Maraykanka.

Howlgalka uu ku dhintay Kyle Milliken oo ka dhacay degaanka Dareslaam ee gobolka Sh/hoose ayaa waxaa sidoo kale warbaahinta Maraykanku xaqiijiyeen iney ku dhaawacmeen labo askari oo maraykan ah iyo turjubaan Soomaali ah, iyadoo wax khasaare ah uusan soo gaarin ciidamada kumandoska Somalia ee kuwa Maraykanka ku wehliyey weerarkan oo iyagoo dayuurado Helicobter ah wata ku degay degaanka Daresalaam halkasoo ay kula dagaalameen xoogaga Al-shabaab.