Waraabayaal Weerar ba’an ku haya Deegaan u dhow Laascaanood iyo Khasaare dhimasho oo uu Sababay
Laascaanood 11.June 2015 (SDN/QJ)-Waraabayaal duullaan ah ayaa dad ku dilay halka lagu magcaabo Abbeesaleey oo qiyaastii 20-km ka badan Laascaanood kaga aadan dhinaca Waqooyi.
Duullaankan ayaa waxay waraabayaashan ku dileen gabar yar oo Saddex Sano jir ahayd, iyagoo ka qaatay sida ay noo sheegtay Ubax Cabdi Maxamed “Bulunbul” oo habaryar u ah gabadha gudaha aqal Soomaali; iyadoo ay Qaylinayaan Hooyadeed, Aabbaheed iyo Caruurtii la dhashay.
Isku-dayo badan oo dadku sameeyaan ayaan lagu guulaysan in laga badbaadiyo gabadha yar, taasoo dhaawac ku keentay hooyadii gabadhaas yar dhashay oo illaa hadda aan caafimaadkeedu fiicnayn sida ay sheegtay, Faadumo Warsame Cabdi Qaal oo Ayeeyo u ahayd gabadha Waraabuhu qaaday.
Gabadhan yar ayaa noqonaysa tii labaad ee isla reerkan uu ka qaato Waraabe xilli haatan sannad laga joogo; xilligaasoo weerar xoog ah kaga qaaday wiil ay ayeeyo u tahay Faadumo Warsame oo ilmahana ayeeyo u ah.
Duullaanka Waraabaha oo la sheegay in uu bilihii u dambeeyey ku wajahnaa dadka dega deegaanka Adhi-cadeeye, iyadoo dadka Qaarkii sheegayaan in Colaad lagula kacay Waraabaha ay salka ku hayso duullaanka haatan salfaday gabadha yar.
Ugu dambeyn, Maxamuud Bille ayaa sheegay in Waraabuhu uu hadba meel isku urursado oo reero duulaan ku kiciyo, balse badanaa difaac looga toog-hayey lagaga badbaaday iyagan waxyeelo loogu geysto, waxaanu sheegay inaanu xoolaha eegin ee uu si toos ah dadka u abaaro.
Laascaanood SDN/QJ