War Deg Deg ah:-Madaxweynaha Punt land oo ku dhawaaqay Maanta in Somaliland ay Maalgeliso Kooxda Alshabaab ee Galgala ka dagaalanta

Garowe 24.March 2014 (SDN)- Madaxwaynaha dowlada Puntland Dr.Cabdiwali Maxamed Cali Gaas ayaa maanta  sheegay in kooxda Alshabab ee ka dagaalanta buuraha Galgala ay maalgalin iyo taagero ka hesho Sida uu Yidhi mamulka la magac baxay Somaliland.

Hadalkaan ayuu Dr.Gaas ka sheegay kulan uu madaxtooyadda Bosaso kula qaatay qaar ka mid ah waxgaradka iyo qaybaha kala duwan ee bulshada Gobalka Bari isaga oo xusey iney kooxdaanu dhinaca Somaliland ka soo gasho Puntland.

Waxa uu sheegay inay arrintaasi ka war hayaan isla markasna ay beesha caalamka ogaysiinayaan taageerada Somalilnad ay siiso kooxda Alshabab.

Arinta Ugu Hadal haynta badan ee Shacabka ku Nool Maamul Goboleedka Punt land ay Isweydiinayaan ayaa ah socdaalkii madaxwaynaha Somaliland ee todobadkii hore uu ku tagay magalada Laasqoray iyo dilkii maalintii ka danbaysay duleedka magalada Bosaso kooxda Alshabab ugu gaystay allaha u naxariistee taliyihii ciidanka daraawiisha Col.Jaamac Afgaduud.

Hadalka madaxwaynaha Puntland ayaa kusoo Beegmay xili ciidamo faro badan oo Somalilnad lagu arkey deegaanka Carmaale oo 75 km u jira magalada Badhan ee Gobalka Sanaag.

Wasiirka warfaafinta Puntland Cabdiwali Xirsi Indhoguran oo la hadlay warbaahinta Caalamiga ah ayaa sheegay Somaliland inay wado daandaansi iyo dhul balaadhsi ayna ka yeeli doonin arrintaasi.

Sidoo kale Wasiirka Kalluumaysiga ee Somaliland Cali Jaamac Bureed ayaa Sheegay in Somaliland aanay Hal Taako oo dhulkeeda ah uga hadhi doonin Cidkasta oo sheegata Isagoo hogaanka Maamul Goboleedka Punt land u soo Jeediyay in aanay ku Mashquulin Safarka Madaxweyne Siilaanyo uu ku tegay Deegaan ka tirsan dalkiisa.

Saan Saan Colaadeed ayaa laga dareemayaa deegaano ka tirsan Maamul Goboleedka Punt land iyadoo abaabul Ciidana ay Xukuumada Somaliland ka wado Jiidaha Hore ee Xuduuda Somaliland iyo Maamul Goboleedka Somaliyeed ee Puntland .

Garowe SDN.

Qurbejoog.com