Sucuudiga Oo Geela Loogu Meydho Leebaajooyinka Gaadiidka Lagu Meydho !

Riyadh 06. August 2017 (SDN/QJ):- Leebaajada ayaa had iyoi jeer loo adeegsadaa in lagu meydho baabuurta iyo Roogaga guryaha la dhigo, laakiin waxa arrin aad u layaab badan noqotay dhacdo ka dhacday dalka Sucuudiga oo ah in leebaajada lagu meydho baabuurta loo adeegsaday in lagu meydho Awr.

Sidoo kale arrinta layaabka badan ayaa waxay tahay in mulkiilayaasha leebaajooyinka ee dalkaasi Sucuudigu ay shaaciyeen in awrta ku dhaqan dalkaasi lagu meydhi karo leebaajooyinka qiimaha lagu meydhayaana uu yahay qiimaha lagu meydho baabuurta waawayn, arrintan ayaa noqotay arrin aad looga hadal hayo dalkaasi Sucuudiga waxaana baraha bulshada lagu baahiyay muuqaalo muujinaya awr leebaajo loogu meydhayo, dalka Sucuudiga ayaa aad loogu dhaqdaa geela waxaanay dadku ku dhaqan baadiyaha dalkaasi iskugu faanaan hadba tirada geela ah ee qoys kastaaba uu dhaqdo, balse in Awr leebaajo loogu meydhaa waa wax aan hore u dhicin.