SSC-Khaatumo oo sheegatay in Halkoodii aanu dhamaan, Ceerigaabona ka maqan tahay

Laascaanood (QJ) – Horjoogaha Maamulka SSC-Khaatumo Cabdiqaadir Aw Cali Firdhiye ayaa ku baaqay in la xoojiyo halganka loogu jiro dib u soo celinta qaybo ka mid ah gobolada Sool iyo Sanaag oo ay ka arrimiso Somaliland. Firdhiye oo shacabka kula hadlay deegaanka Boocame ayaa ku booriyay bulshada inay garab istaagaan ciidamada SSC-Khaatumo ayna sii xoojiyaan dadaalkooda. Waxa uu Somaliland ku eedeeyay inay barakicinayso dadka SSC-Khaatumo.

“Halganku weli ma dhammaan. Laga soo bilaabo Xeedhadhanka ilaa Ceerigaabo qas baa ka jira, dadkeenii waa la barakiciyey, guryahoodiina waa la qaatay. Waxa aanu hadda arkaynaa waa u diyaar garowga waxa soo socda,” ayuu yidhi Firdhiye.

Maamulka SSC-Khaatumo oo xaruntiisu tahay Laascaanood isla markaana gacanta ku haysa inta badan gobolka Sool iyo qaybo ka mid ah Sanaag, ayaa la aas-aasay ka dib dagaal muddo sannad ah socday oo sababay in Somaliland ka baxdo Laascaanood.

Sidoo kale, maamulka ayaa diiradda saaraya sidii dib loogu soo celin lahaa magaalada Ceerigaabo oo ay hadda gacanta ku hayso Somaliland. Horaantii sanadkan ayay ahayd markii ciidamada SSC-Khaatumo ay gudaha u galeen magaalada balse maalmo kadib ayaa lagu qasbay inay isaga baxaan.

Geesta kale, Xukuumadda Somaliland ayaa wadda dedaallo lagu dejinayo xaaladda Ceerigaabo, iyadoo doonaysa inay dhex dhexaadiso beelaha wada dega magaaladaas.