Soomaaliya iyo Itoobiya oo kulamo uga bilowdeen Turkiga

Ankara (QJ) – Wafuud ka kala socota Soomaaliya iyo Itoobiya ayaa ku sugan magaalada Ankara ee dalka Turkiga, halkaasi oo ay uga socdaan wada tashiyo farsamo oo la doonayo in lagu dhameystiro heshiiskii December 2024-ka ee la doonayay in lagu qaboojiyo xiisadda u dhaxeysa labada dal.

Kahor wada xaajood toos ah oo lala yeelanayo Itoobiya, wafdiga Soomaaliya ayaa marka hore kulamo gaar gaar ah la yeelan doona madaxda Turkiga ee dhexdhexaadinta ka wada.

Wasiirka Warfaafinta, Dhaqanka iyo Dalxiiska ee Soomaaliya, Daa’uud Aweys Jaamac, ayaa ku sheegay X (Twitter) in wada-hadallada ay uga gol leeyihiin xoojinta xiriirka diblomaasiyadeed, nabadda, iyo hirgelinta baaqii Ankara.

“Wafdiga Soomaaliya ka socda ayaa u yimid Ankara si ay uga qaybgalaan wejiga koowaad ee wada-hadallada farsamo ee u dhexeeya Soomaaliya iyo Itoobiya, kaas oo looga gol leeyahay in lagu hormariyo baaqii Ankara, Soomaaliya weli way ka go’an tahay nabadda, wada-shaqeyn dublamaasiyadeed oo ku dhisan is-faham, iyo ixtiraam,” ayuu yiri Wasiir Daa’uud Aweys.

Tan iyo bishii December 2024, Soomaaliya iyo Itoobiya waxay yeesheen wadahadallo kala duwan, kaddib kulankii dhexmaray Madaxweynaha Soomaaliya Xasan Sheekh Maxamuud iyo Ra’iisul Wasaaraha Itoobiya Abiy Axmed, kaasoo gacan ka geystay in la soo koobo khilaafkooda.