Somaliland Guul darada Siyaasiga Iyo Kenya oo u Soo Xadhko Xidhatay Sidii ay u qaadan lahayd Qaybta yar ee ka Nool Dhaqaalihii Ummada

Hargaysa 26.July 2016 (SDN/QJ):- Iyadoo dawlada Kenya suuq u raadinaysa Jaadka Miirooga ee kasoo baxa dalkeeda ayaa waxaa todobaaddkii Hore kulamo kala duwan magaalada Hargeysa ku yeeshay wafti ka socda dawlad Kenya iyo Masuuliyiinta Xukuummada Somaliland.

 

Madaxwaynaha Somaliland ayaa kulan la qaatay Xildhibaano iyo masuuliyiin ka socda dawlada Kenya kuwaasi oo ka wada hadlay sidii Jaadka Miirooga loo keeni Lahaa Somaliland kadib markii Dawlada Engiriisku iska joojisay Jaadka Kenya.

 

Wasiirka arrimaha Dibada Somaliland Sacad Cali Shire, oo warbaahintu wax ka waydiisay ujeed weftiga ka socda dawlada Kenya ayaa sheegay “ Waftigaasi waxay u socdeen sidii ay suuq ugu heli lahaayeen Jaadka Miirooga ee ay soo saaraan, dawlada waliba waxay soo saarto suuq ayay u raadisaa”Ayuu yidhi Sacad Cali Shire waxaanu intaasi ku daray “ Heshiis lagama gaadhin kulamadaas”

 

Wasiirka arrimaha Dibada Somaliland Sacad Cali Shire waxaa uu sheegay in waftigaasi ay ka wada hadleen ictiraafka Somaliland oo ay kulamo kale la yeelan doonaan.

Si kastaba ha ahaatee dhaqangalka arrintan ayaa Cawaaqib Xun ku yeelan doona dhaqaalaha Yar ee Gacmaha ugu sii Jira dadka Somaliland iyadoo Xukuumadu aanay ilaa iyo hada dhigin Siyaasad ay Kenya kaga bedelanayso Wax soo saarka Somaliland.