Sirdoonka Djibouti Oo Aqallada Hargeysa Muwaadiniin Kala Soo Baxaya iyo Xukuumadda Madaxweyne Siilaanyo Oo Wali Sii Wadda Ka-ganacsiga Shacabkeeda
Hargeysa:July,09,2014(SDN/QJ)-Wali waxa ay Xukuumadda Somaliland sii waddaa Ka-Ganacsiga Muwaadiniinteeda, waxana Habeenkii Xalay Sir-Doonka Dalka Jabuuti oo kaashanaya Ciidamada RRu-da ee Somaliland ay Gurigooda kala baxeen lamaane is qaba oo deganaa Xaafadda Jig-jiga yar ee magaalada Hargeysa.
Lammaanahan Xaaska ah ee is Qaba oo magacyadooda la kala yidhaahdo Cabdilaahi Caawiye iyo Nuura Aw-yuusuf Odowaa, ayaa Qafaalashadooda ay ka dambeeyaan xubno ka mid ah Sirdoonka Dalka Jabuuti oo ku sugan Magaalada Hargeysa, kuwaas oo la sheegay inay daba joogaan isla markaana daydayayaan cidii ka dambaysay Qaraxii dhawaan lala beegsaday Dalka Jabuuti, iyagoo horena Gacanta ugu dhigay Saddex Muwaadin oo reer Somaliland ah, kuwaas oo qaar ka mid ah Geeri lagu sheegay.
Waxa kale oo Habeenkii Isniintu Soo Galaysay Laga Fuliyay Hawl-gal labaad Agagaarka Jaamac Gunti ee Xaafadda Xero-Awr ee Magaalada Hargeysa, iyadoo Halkaana lagula Baxay laba nin oo ay ehel yihiin muwaadin hore loogu gacan geliyey Sirdoonka Djibouti oo ka Hawlgeli jirey Xawaaladda Jubba.
Hawl-galadan Sirdoonka Dalka Jabuuti kula Baxayaan Muwaadiniinta reer Somaliand oo bilaabmay habeenkii isniintii iyo Salaasadii ee Wiigan aynu ku jirno ayaa ka dambeeyay imaatinkii ay dalka kusoo laabteen Wasiirka Wasaaradda Arrimaha Gudaha Somaliland Md. Cali Maxamed Warancade iyo Taliyaha Ciidanka Booliska Somaliland Taliye Guuto Cabdilaahi Fadal Iimaan, kuwaas oo safarkooda imaatinka ay ku wehelinayeen laba xubnood oo ka tirsan Sirdoonka Dalka Jabuuti, halka Laba xubnood oo kalena Hore u sii Joogeen Dalka.
Hawl-galkan Xubnaha Sirdoonka Jabuuti iyo Ciidamada RRU-da Somaliland ay ku fuliyay lamaanaha is qaba, oo talagalkiisu ahaa in shalay oo Salaasa ahayd loo gudbiyo Dalka Jabuuti ayaa Dhaliyay Khilaaf Xoogan oo ka dhex dhashay ama ka dhex aloosmay Ehelada lamaanaha Is Qaba iyo Xukuumadda.
Ehellada Dadkan la xidhay oo ogaaday in dadkooda loo wado Djibouti, ayaa si adag uga horyimi tallaabada Hay’adaha Ammaanka Somaliland ugu gudbinayaan Muwaadiniintan, waxana ay ku Hanjabeen In arrintu Gacan-ka-hadal gaadhi doonto Haddii aan laga Waantoobin Muwaadiniinta la dhiibayo.
Murankaas ayaa wali taagan, wararka aanu Haynaana waxa ay sheegayaan inaan wali dadkaas la Gudbin, balse lala Sugayo Xubno kale oo wali Magaalada Gudaheeda laga Raadinayo, iyadoo Ehalladii Dadka Xidhani ay Heegan ugu jiraan Sidii ay iskaga Caabin lahaayeen Tallaabo kasta oo Dadkaas lagu Gudbinayo.
Tallaabooyinka muwaadiniinta reer Somaliland loogu gacan-gelinayo Dawladda Djibouti ayaa Boog madow ku ah Xukuumadda Madaxweyne Siilaanyo, waxana Arrintan si weyn looga Hadal hayaa Guud ahaanba Somaliland, iyadoo aan wali shacabka loo sheegin sabab cad oo dhiibitaanka Muwaadiniinta Loo Cuskanayo, maadaama uuu hore Xeer Ilaaliyaha Guud ee Qaranku u shaaciyey in arrintaasi si cad sharciga u baalmarsan tahay Hay’adiisuna aanay waxba ka ogayn.
SDN/QJ-Hargeysa