Shirweynaha 15-aad ee Cilmi-baarista Soomaaliyeed oo Muqdisho ka Furmay

Muqdisho (QJ) Madaxweynaha Jamhuriyadda Federaalka Soomaaliya, Mudane Xasan Sheekh Maxamuud, ayaa daah-furay Shirweynaha 15-aad ee Cilmi-baarista Soomaaliyeed (International Congress of Somali Studies), kaas oo markii ugu horreysay muddo 35 sano ah maanta lagu qabto magaalada Muqdisho.

Madaxweyne Xasan ayaa ku nuux-nuuxsaday muhiimadda ay leedahay in qaab cilmiyeysan loo adeegsado daraasaadka caqabadaha hortaagan horumarka dowlad-dhisidda, horumarinta dhaqaalaha, iyo aqoonta Soomaaliya. Waxa uu xusay in dowladda ay ka go’an tahay in ay taageerto aqoonyahannada iyo cilmi-baarayaasha Soomaaliyeed si xal waara loogu helo arrimaha ka hor-tagaya isku-filnaanshaha shacabka Soomaaliyeed.

“Halgankii aan ku jirnay dowlad dhisidda tan iyo burburkii, waxaan mar walba dareemaynay maqnaanshaha kaalintii mufakiriinta Soomaaliyeed oo si dhab ah u darsin lahaa dhibaatooyinka na soo food saara, nasiib wanaag shirweynahan waxa uu soo galay waqtigii ugu muhiimsanaa, waana inaan ka faa’ideysanaa. oo degdeg ah.”

Shirweynihii 15-aad ee Cilmi-baarista Soomaaliyeed oo markii ugu horreysay la qabtay sannadkii 1979-kii, ayaa waxaa sannadkan ka qaybgalay ergooyin ka badan 400 oo qof, kuwaasoo isugu jiray aqoonyahanno Soomaaliyeed, cilmi-baarayaal caalami ah, iyo qaar ka mid ah madaxda jaamacadaha Geeska Afrika. Shirweynahan ayaa la filayaa in lasoo gaba gabeeyo iyadoo daraasado diiradda lagu saarayo horumarinta bulshada Soomaaliyeed.