Shil Baabuur oo Naxdin Leh oo Maanta Ka Dhacay Duleedka Bari ee Magaaladda Hargaysa, Tirada Dhimashada & Magacyadooda DAAWO

Hargaysa 06. July 2017 (SDN/QJ):- Alle ha u Naxariistee Sadex qof ayaa ku Geeriyooday Shil baabuur oo ka dhacay Goob u dhow Kaantaroolka Bari ee Magaaladda Hargaysa ee Haleeya.

Labada Gaadhi ee isku dhacay, ayaa kala ahaa Gaadhi Booyad ah oo dhinaca Aw-Barkhadle ka yimi oo Hargeysa ku soo socday iyo Gaadhi kuwa Xamuulka ah, gaar ahaan kuwa Waaraadka loo yaqaanno oo dhinaca Hargeysa ka baxay una sii jeeday geesta Berbera, waxaanu shilkaasi dhacay markii Gaadhiga Waaraadka ahi ku dhacay Gaadhiga Booyadda ah oo uu qaarka hore Jaray.

Allaah ha u naxariistee, Magacyada Saddexda Marxuum ee Shilkaas Baabuur ku dhintay, ayaa lagu kala sheegay; Maxamed-Sidiiq Cabdillaahi Diiriye, Cabdikariim Guray Aw Muuse iyo Cabdiraxmaan Xariir Nuur. Masuuliyiinta Booliska iyo Taraafikadu waxay sheegeen inay baadhayaan sidii Shilkaasi u dhacay.

Waxa markii Shilkaasi dhacay ka dib, goobta uu Shilku ka dhacay gaadhay Taliye Ku-xigeenka Ciidanka Booliska Somaliland Cabdiraxmaan Liibaan Axmed (Fooxle), Afhayeenka Booliska ahna Taliyaha Ciidanka nabadgelyada waddooyinka (Taraafikada) Faysal Xiis iyo Saraakiil kale oo Taraafikada iyo Booliska ka tirsan, iyaga oo halkaas Warbaahinta kula hadlay.

Muuqaallada Gawaadhida isku dhacday siday noqotay oo laga soo guray Meydadka Dadka ku dhintay, inkastoo Masuuliyiinta Ammaanku Dad ku dhaawacmay aanay sheegin iyo sida ay uga warbixiyeen, waxaannu idiinku soo gudbinaynaa Muuqaalkan Hoose ee Daawasho wacan oo wanaagsan:-