Shabaab oo qarax la beegsaday xarunta Barwaaqo

Muqdisho November 07, 2023 (QJ) -Qarax xooggan ayaa lagu soo warramayaa in caawa fiidkii uu ka dhacay degmada Dayniile ee magaalada Muqdisho, kaasoo saameyntiisa laga dareemay meelo badan.

Wararka aan heleyno ayaa sheegaya in qaraxa uu burbur xoogan ka soo gaaray xarunta Barwaaqo ee degmada Dayniile oo ay degan tahay mid ka mid ah shirkadaha isgaarsiinta dalka.

Wararka ayaa sheegaya in qaraxa uu ka dhacay agagaarka xarunta, iyadoo aan la ogeyn baaxada khasaaraha ka dhashay, base uu jug gaarsiiyay daarta xarunta.

Ciidamo ka tirsan kuwa xoogga dalka Soomaaliya ayaa gaaray goobta uu qaraxu ka dhacay, iyagoo halkaasi ka sameeyay baaritaano.

Lama oga ilaa hadda sababta rasmiga ah ee ka dambeysay qaraxan, balse wararkii ugu dambeeyay ayaa sheegaya in uu jiro khilaaf u dhexeeya Al-Shabaab iyo qaar ka mid ah shirkadaha isgaarsiinta ee ka howlgala deegaankaasi, kaasoo ka dhashay amaro ay soo saareen oo ay shirkaduhu diideen inay u hoggaansamaan.