SAWIRRO: Banaan bax balaaran oo maanta ka dhacay magaalada Muqdisho

Muqdisho,11,7,2016 (QJ/SDN) – Waxaa maanta Barxada masjidka Isbaheysiga Islaamka ee magaalada Muqdisho lagu qabtay banaan bax balaaran oo looga soo horjeeday laguna canbaareenayay qaraxii Ismiidaaminta ahaa ee dhawaan ka dhacay meel ku dhaw MASJIDU NABAWI AL-SHARIIF ee kuyaala magaalada Madiina.

Banaan baxan waxaa soo abaabulay Hay’ada Culumada Soomaaliyeed waxaana kasoo qeyb galay masuuliyiin katirsan Dowlada Soomaaliya, Culumaa’udiin iyo Boqolaal qof oo ka kala yimid xaafadaha kala duwan ee magaalada Muqdisho.

Dadka dhigayay banaan baxa ayaa watay boorar ay ku qoran yihiin cambaareynta qaraxa ka dhacay Madiina iyo sidoo kale Ereyo lagu amaanayo nabigeena Muxamed NNKH iyo guud ahaan ahmiyadda ay leedahay ilaalinta goobaha xurmadda leh .

Sheekh Nuur Baaruud Gurxan , oo kamid ahaa Culumadii ka hadlay Banaan baxa ayaa si kulul u cambaareeyay Weerarkii ka dhacay meel ku dhaw Masjidka Nabiga, waxa uuna ku booriyay umada Islaamka in ay kasoo horjeestaan kana dhii dhiyaan falalka guracan ee argagaxisa .

Dhawaan ayey aheed markii nin waxyaabaha qarxa isku so xiray uu isku qarxiyay banaanka Masjidka Nabigeena NNKH , waxaana weerarkaasi ku dhintay afar askari oo ku sugnaa koontaroolka laga galo Masjidka Barakeesan .