|

‘’Rooxaani Way Ka Go’an tahay Dardar gelinta Isbedelku Laakin ma Hirgelin karaa? Waa Doorashadii Mar Labaad Shacabka Iran u Cugteen inuu Hogaanka u sii hayo Madaxweyne Xasan Rooxaani

Tahran  21. May 2017 (SDN/QJ):-Doorashadii Madaxtooyada dalka Iraan waxa ku guulaystay Madaxwayne Rooxaani oo ah hogaamiyaha isbedelka waxanu kaga adkaaday musharixii muxaafidka mayalka adag Garsoore Ebrahimi Raisi ee ka soo horjeeda isbedelka ay taageersan yihiin ilaa hadda inta badan dadka Iraan siday ay muujisay natiijadu.

Lakiin weli awoodda xukunka ee Garsoorka iyo Amniga waxa gacanta ku haya muxaafidka mayalka adag ee isbedel-diidka ah.

Musharaxa laga badiyay Garsoore Ebrahimi Raisi ayaa ahaa musharaxa uu la jiray wadaadka awooda ugu saraysa iyo go’aanka kama dambaysta ah leh Jamhuuriyadda Islaamiga ah ee Iran.

Wakhtigii ololaha Madaxwayne Rooxaani wuxu si ba’an oo aan ka gabsho lahayn u weerarayay muxaafidka mayalka adag iyo musharaxooda waxanu xilyada banaabaxyada toos u naqdiyi jiray heerka xuquuqal aadamiga ee dawladda isaga oo yidhi ” kuwa carabyada jaraya afafkana tolaya”.

Dood uu todobaadkii hore la galay wuxu ku eedeeyay Raisi in muraadkiisu yahay ” in si qaldan uu diinta ugu adeegsado awooda”.

Rooxaani wuxu si wax ku ool ah uga badiyay musharaxii uu la jiray Ayaatullah Cali Khumayni, Garsooraha mayalka adag Ebrahimi Raisi.

Laakiin hadana hogaamiyaha Awoodda ugu saraysa ayaa leh go’aamada kama dambaysta ah ee siyaasadda awoodaha xukunka ee Garsoorka iyo Amnigaba waxa gacanta ku haya muxaafidkiisa mayalka adag.

Sidaa daraadeed Rooxaani waa inu ku xisaabtamaa la dhaqankooda haddii kale wuxu ku dambayn sidii Madaxwaynihii hore ee isbedel doonka ahaa Maxamed Khatimi ee ku fashilay labadii muddo xileed uu kursiga ku fadhiyay

Madaxwayne Rooxaani markii uu isku hubsaday guusha wuxu balan qaaday in Iraan uu dunida u furi doono dadkeeduna ay ku naaloon doonaan xoriyadda ay mudan yihiin inay helaan isaga oo dhinaca kalena ka feejigaysanaya ridal ficilka Muxaafidka mayalka adag

Comments are closed