QM oo shaaciyay in C/Qaadir Muumin yahay madaxa Daacish

Muqdisho (QJ) – Warbixin ay toddobaadkan soo saartay kooxda dabagalka cunaqabataynta Qaramada Midoobay, oo ka soo xigtay xogaha laga helayo dalalka xubnaha ka ah Qaramada Midoobay, ayaa lagu sheegay in kalsooni xooggan lagu qabo in hoggaamiyaha Daacish uu yahay Cabdulqaadir Muumin, oo sidoo kale madax u ah kooxda argagixisada ah ee laanteeda Soomaaliya.

Tirada wadamada aaminsan inay aqoonsadeen hogaamiyaha kormeeraya hawlgalada caalamiga ah ee ISIS ayaa sii kordhaya, sida ay sheegtay VOA.

Warbixintu waxay tilmaamaysaa in doorka Muumin ee hawlgallada caalamiga ah ee Daacish aanu marnaba shaki ku jirin. Warbixinadii hore ee sirdoonka Qaramada Midoobay ayaa soo jeediyay in loo dalacsiiyay inuu hoggaamiyo Agaasinka Guud ee Gobollada ee Dawladda Islaamka, taasoo u oggolaanaysa inuu xukumo laamaha kooxda ee Afrika.

Qiimeyntan ayaa sii xoogeysaneysa, iyadoo dalal badan oo xubnaha ka ah Qaramada Midoobay ay isku raaceen in Daacish ay la qabsaneyso xaqiiqada ka jirta Ciraaq iyo Suuriya, taasoo lama huraan ka dhigaysa in saraakiisha muhiimka ah loo raro gobollo kale.

Warbixintu waxay xustay in tan iyo markii la dilay hoggaamiyihii Daacish, Abu Bakar al-Baghdadi 2019-kii, laguna beddelay 2022-kii, ay kooxdu isku dayday inay qariso aqoonsiga hoggaamiyeyaasheeda iyadoo hoos u dhigaysa muuqaalkooda guud.

Intaa waxaa dheer, warbixintii ugu dambeysay ee Qaramada Midoobay ayaa lagu sheegay in tan iyo weeraradaas, Muumin uu qaaday tallaabooyin uu ku yareynayo dareenka dibadda ee kooxda.

Sida warku sheegayo, waxa la sheegay in saldhiga uu Muumin ka hawlgalo uu yahay Buur-dhexad, oo ah shabakad isku xidhan oo godad iyo dhismayaal adag ku leh buuralayda Cal Miskaad ee Silsiladda Golis, kuwaas oo la aaminsan yahay in loo qorsheeyay inay iska caabiyaan duqeymaha diyaaradaha reer galbeedka.