Puntland oo ciidamadeedda heegan gelisay

Bossaso November 24, 2024(QJ)Taliyaha guud ee ciidamada difaaca Puntland General Aadan Cabdi Xaashi ayaa booqasho aan horay loo sii shaacin ku tagay buuraha Galgala, isagoo halkaasi kaga dhawaaqay diyaar garow dagaal iyo diyaar garow dagaal.

General Aadan Cabdi Xaashi oo uu wehliyo Taliyaha Qeybta 7-aad ee Gobolka Bari Gaashaanle Sare Barkhad Cabdullaahi Yuusuf iyo Saraakiil kale ayaa maanta oo Sabti ah booqasho ku tagay Buuraha Golis. Waxay si gaar ah u kormeereen fariisimaha Sugurre iyo Balli-khadar oo ay ku sugan yihiin ciidamada Puntland.

Jeneraal Aadan Cabdi Xaashi ayaa mudadii uu ku sugnaa saldhigyadaasi waxa uu warbixino ka dhageystay taliyayaasha ciidamada kala duwan ee ku sugan halkaasi.

War qoraal ah oo ka soo baxay taliska guud ee ciidamada difaaca Puntland ayaa lagu sheegay in Jeneraalku amar ku bixiyay in dhammaan ciidamada difaaca ay u diyaar garoobaan guluf dagaal oo la doonayo in lagu cirib tiro argagixisada ku dhuumaalaysanaya qeybo ka mid ah dhulka buuraleyda ah ee gobolka Bari.

“Jeneraalku waxa uu faray dhammaan ciidamada difaaca in ay u diyaar garoobaan ololaha dagaal ee lagu ciribtirayo kooxaha argagixisada ah ee ku dhuumaalaysanaya qaar ka mid ah deegaanada buuraleyda ah ee Puntland, qorshahan ayaa hadda ah qorshaha ugu muhiimsan ee dowladda Puntland,” ayaa lagu yiri warsaxaafadeedka.