Muranka UCID: Gar Waa Loo Wada Islaam Murashaxnimada Jamaal Cali Xuseen Muran iyo Mad-Madow Midna Ma Geli Karto! Amb. Kaysar Cabdilaahi Maxamed

• Doqonniimo kugu baahday baan, cidi dabiibayne
• Duulkii inkaar qaba jinbaa, daasadaw tumo e
• Dab markuu bakhtiyo meel kalaa, dogob ka qiiqaaye
• Waagii dilaacaa naxdimo, dihin la sheegaaye
• Dul iyo hoosba waan ugu dhigee, waa dix-dhagaxeede
• Anunbaa damqanayee dheguu, uma daloolaane
• Dadkaan la hadlayaa baan lahayn, dux iyo iimaane
• Bal inay dalfoof tahay caqliga, dooni laga saaray
• Wixii hore usoo daashaday, degashanaysaaye

Abwaan Timo-Cade. Allah Yarxam

Maantana waa Maalin kale oo Murugo iyo Muran Siyaasadeed oo Yaab iyo amakaag ku riday guud ahaan Shacbiga reer Somaliland iyo Gaar ahaan Taageerayaasha Xisbiga UCID oo ku waabariistay Murashixii Xisbiga UCID Mudane Jamaal Cali Xuseen iyo Gudoomiyhii Xisbigaas Mudane Faysal Cali Waraabe oo gambadh isugu soo fadhiistay oo midba ka kale erayo uu ku durayo uu warbaahinta u mariyay.

Run ahaan wax lala yaabo ayay noqtay in Xisbiga UCID oo ah Xisbiga ugu Da’ada weyn Saddexda Xisbi qaran ee maanta Somaliland ka jira, isla markaana ahaa Xisbigii Labaad ee la diiwaan geliyo ee ku xigay UDUB tii burburtay isla markaasna ahaa Xisbi laga filayay inuu wax ka barto Burburkii iyo Khilaafkii riiqda dheeraa ee soo maray in maanta ay marayso in Madaxdii u sarraysay ay TV yada isu soo fadhiistaan.

Maaha in dhacdadani ay Ceeb ku tahay Madaxda Xisbiga UCID oo kaliya, ee waxay ceeb ku tahay guud ahaan Geedi socodka Dimiuqraadiyada Jamhuuriyada Somaliland oo la filayay inay ka gudubtay heerkan xagxagashada iyo muranka ku dhisan ee ay dhawaanahan dib ugu soo noqotay. Waxaana lagama maarmaan ah oo Shacbiga reer Somaliland ay guud ahaan Siyaasiyiintooda ka filayaan inay noqdaan qaar ka gudba yooyootanka iyo muranada macno la’aanta ah ee joogtada noqday.

Iyada oo aanan waxba ku sii tiigaalin muranka hadda ka soo cusboonaaday Madaxda u sarreysa Xisbiga UCID, isla markaasna aan ku rajo weynahay inay dhakhso u xallin doonaan khilaafka soo kala dhex galay ayaa waxaan jecelahay inaan tilmaamo in Jamaal Cali Xuseen uu laf-dhabar u ahaa in Xisbiga UCID uu dib saaxada ugu soo noqdo ka dib markii uu burburku ku dhacay ee garabii Cabdirxamaan Cirro hogaaminay ay ka jabeen, markaas oon Xisbiga UCID uu qarka u saarnaa inuu siqiiro.

Mudane Jamaal Cali Xuseen waxa uu Xisbiga ka soo qaaday Dhulka, waxaana uu gaadhsiiyay inuu Guulaysto o uu Saddexdii Xisbi Qaran ee soo baxay uu UCID ka mid noqdo, waxaana yaab iyo amakaag ah in maanta Shaki iyo Madmadow la geliyo Murashaxnimada Madaxnimo ee Xisbigaasi uu u doortay Mudane Jamaal Cali Xuseen.

Iyada oon aanan Xubin ka ahayn Xisbiga UCID siyaasadiisadihiisana aanan taageero u ahayn, hadana Muwaadin ahaan waxaan tilmaamayaa in Jamaal Cali Cali Xuseen uu yahay Murashaxa Sharciga ah ee Xisbiga UCID cid awwood u leh inay ka bedesho ama muran gelin kartaana aanay jirin. Mudane Faysal Cali Waraabana waxaa la gudboon inuu dib u eego marxaladihii qadhaadhaa ee uu soo maray Xisbiga UCID kana fogaado burbur kale oo ku yimaada Xisbigan oo Xoog iyo Xoolaba la gelinayay sanado tiro badan. Waxaanan usoo jeedinayaa labada Masuul ee Faysal iyo Jamaal inay khilaafaadka soo kala dhex gala ay hoos ahaan u dhamaystaan kana fogaadaan in Warbaahinta ay isku weeraraan.

 NB: Waa Fikirkayga Shakhsiga ah

 

Allow Eex ma Tiraabine Aqoon haygu Cadaabin

Amb. Kaysar Cabdilaahi Maxamed