“Miyaanay Ceeb Inagu Ahayn In Dastuurkii Qaranku Noqdo, Margi Nimba Siduu Doono U Jiidh-Jiidho” Jaamac Gug soo dhacay
Lyon 28 June, 2015 (SDN/QJ)- Xoghayihii guud ee xisbigii UDUB Jaamac Yaasiin Faarax oo tan iyo shan sanno ka hor markii laga guulaystay xisbigiisii ku maqnaa wadanka Faransiiska oo uu hore u degenaa, ayaa ka hadlay marxaladda siyaasadeed ee dalku ku jiro iyo muddo kordhintii loo sameeyey xukuumadda Madaxweyne Siilaanyo.
Jaamac Yaasiin Faarax oo qoraal dheer ka soo qoray magaalada Lyon ee wadanka Faransiiska oo uu degen yahay ayaa dhawr iyo toban su’aalood ku cabiray xaalada lagu jiro iyo sida uu u arko heshiiskii Madaxtooyada iyo axsaabta siyaasaddu qalinka ku duugeen, kaas oo aan illaa hadda midho dhal noqon, oo laga sugayo in la dhaqan geliyo.
Mr. Jaamac ayaa qoraalkiisa arar uga dhigay jidkii ay mareen hoggaamiyihii daraawiishka iyo keli taliyihii nidaamkii macangaga ahaa ee Soomaaliya dhaxal wareejiyey, kuwaas oo uu xoghayaha guud werwer ka muujiyey in la raaco sunnihii qallafsanaa ee ay jideeyeen ee markii dembe iyagana galaaftray. Qoraalka xogahaya guud oo dhamaystiranina waxa uu u dhignaa sidan: “Waa falkii gurracnaa ee lagu diiday Hororkii Ina Cabdilleh Xasan, kuna jabay. Waa falkuu ka dumaaley Kaligii-Taliskii Ina Siyaad Barre, ee haligmay. Illaahay baan idinku dhaariye, ma labadaas daalin ee mabaadiida burburinta ummadda Somaliland ku bahoobay, ayaynu jidkoodii raacnaa?, Ma waxaan dastuurka bulshadu dhigatay ahayn (97%), ayaynu isku maamulnaa?, Ma koox yar baynu u muraad quminaa, oo qaran dhan ayaynu xaqiisa duudsinaa?, Ma horumarkaynu gaadhnay ayaynu caras-qalnaa , oo raad keeni ayeynu dib u raacnaa?, Ma halgankii dheerah, xoriyaddii iyo midnimaduu keenay ayaynu midhaheeda ubadkeena ka afqabanaa?, Gartaas eexashada ku qotonta, ee munaafiqadda xambaarsan, Eebeheen ma inaga dhaafayaa?, Miyaanay badbadada ummadu ku jirin in aynu isugu hiilino axdigaynu bulsho ahaan wada dhiganay?, Waar miyaanay ceeb inagu ahayn, in dastuurkii qaranku noqdo margi, nimba siduu doono u jiidhjiidho, ama u turjomo, isagoo af-soomaali faseexa ku qoran?.
Haddaan lays-yeelyeelaynin, labada qodob ee 42aad iyo 83aad, ayay ku qayaxan yihiin sababaha muddo-kordhini ku iman karto iyo xaytabyada loo dhigay-ba. Iska kordhi uun ma aha ee GDQ oo keliya, ayaa leh mas’uuliyadda magacawga taariikhda loo cayimaayo doorashada. Iyana si cad oo cilmiyeysan ayay u tafatireen barnaamijkooda ku aadan doorashooyinka qaranka loogu tala yalay. Ceebina kama raacin, oo way asiibeen. Madaxweynaha dalka way qanciyeen, Wuxuu isna proposals-kii u gudbiyey Golaha Guurtida, si waajibkooda dastuuri uga gutaan. GDQ-ku way hor tageen Golaha Wakiillada, si fiicanna way u qanciyeen, iyaga oo muddo-kordhin macquul ahna raaciyey.Taakuleeyayaashii caalamkuna way ku duceeyeen, Axsaabtii qaranku may ka hor iman nadaamka farshaxanta loo dhigay. Waar bal tabco-dhexaadkan, uu Saleebaan Gaal ku kacay, meesha miyey-ba Qabataa? Saw maaha qalad, in la saxo u baahan , intaanu aafo abuurin?.
Madaxweynuhu wuxuu ku baaqay in state holders-ku iska arkaan, Madaxweyne ku xigeenkiisa Mudane Cadiraxmaan Saylici, ayuu arrintii u xilsaaray. Madaxweyne K/X-kuna, intuu saddexdii xisbi qaran la kaashaday, ayuu arrinkii go’aan loo dhan yahay, oo uu saxeexay, kaasoo gudbiyey.Waa nadaam dhan, oo dawlad lagu yaqaanay. Waxa gaab noqotay, Madaxweynihii dalku, illaa maalinkan maanta ah, hadal laguma hayo. Alla qabay, afkana waa yaqaan, waana ka agnaan. Ummaddu waxay sugaysaa go’aanka Madaxweynuhu qaadanaayo. Go’aankaasi ma wuxuu noqon doonaa, mid bulshada Somaliland ee nabaddda, xoriyadda iyo horumarka jeceli ku faraxdo?, Mise mid ka duwan, oo guusha siiya cadaw Jamhuuriyadda Somaliland, ee dhegtu taagan tahay? Bal aan eegno uuraysataye, waxay umuli doonto. Waxaan dharwna waa Ilma dhamays ah,oo duco loogu wan-qalo iyo dhicis laga naxo, oo KULMIYE iyo Siilaanyo aakhiraw dira. Allahayow, ummadda Somaliland nasiibkeeda wanaaji, kana badbaadi khasaare iyo burbur, cadowgooda farax geliya.
Aamiin Iyo ciid mubaarik!
Waa Billaahi Tawfiiq
Jaamac Yaasiin Farax
Xoghayihii Xisbiga UDUB
LYON/FRANCE SDN/QJ