“Mas’uuliyiintiisa sarsare WADDANI iyo Murrashax Cirro ayaa ka maarmay TV-ga qaranka iyo Radio Hargeysa” Dooda Wasiir Caddaani ee Dacwada Waddani ka Gudbinayo Warbaahinta Qaranka AKHRI/DAAWO

Hargaysa 05. September 2017 (SDN/QJ):- Wasiirka  Wasaaradd Warfaafinta iyo Wacyigelinta Jamhuuriyadda Somaliland, Md.  Cismaan Cabdilaahi Saxardiid (Caddaani), ayaa sheegay in  masuuliyiinta sarsare ee xisbiga mucaaradka ah  ee WADDANI ay  ka maarmeen warbaahinta qaranka isla markaana ay hanjabaad iyo diidmo qayaxan kala horyimaadaan marka suxufiyiinta warbaahinta qaranku u tagaan.

Wasiirka Warfaafintu wuxuu jawaab adag ka bixiyey  eedo ka soo yeedhay Afhayeenka xisbiga WADDANI, Ibraahim Mahdi Buubaa oo sheegay inuu  dacwad ka dhan ah warbaahinta qaranka u gudbinayaan Komishanka Doorashooyinka oo uu ku eedeeyay inay aflagaadeeyaan madaxda xisbiyada mucaaradka ah.

 

Wasiirku waxa kaloo uu sheegay inaanay aqbalaynin in warbaahinta qaranka la aflagaadeeyo. “TV-ga qaranka iyo Radio Hargeysa waxay leeyihiin shuruuc warbaahineed oo la mid ah ta caalamka oo ay ku shaqeeyaan. Sidaas daraadeed, ciddina farogelin kuma laha  tifaftirista wararkooda iyo barnaamijyadooda iyagaanna ka masuul ah,”ayuu yidhi Wasiirka Warfaafinta oo shirjaraa’id ku qabtay xafiiskiisa shalay.

 

Wasiirka Warfaafintu waxa uu xusay in markasta oo warbaahinta qaranku u tagaan xisbiga WADDANI ay kala kulmaan hanjabaad iyo diidmo cad, waxaannu yidhi; “Masuuliyiinta sarsare  ee Xisbiga WADDANI oo uu ugu horreeyo murrashaxooda Cirro, ayaa ka maarmay TV-ga qaranka iyo Radio Hargeysa, waayo waxay kiraystaan oo lacag badan siiyaan Telefishannada badan, mar kasta oo weriyeyaasha iyo soosaareyaasha  warbaahinta qaranku u tagaan madaxda sare ee xisbiga WADDANI  si ay u waydiiyaan xogo, waxay kala horyimaadaan weriyeyaashaas canaan, aflagaado, hanjabaad iyo diidmo cad oo aan meelna loo soo marin.”

“Haddii ay dhab ka tahay inay baahi u qabaan TV-ga qaranka iyo Radio Hargeysa, sida ay ku andacoonayaan annaga ayaa diyaar u ah ee haddii ay run sheegayaan ha ka soo qaybgalaan dood la dhex dhigo saddexda xisbi. Masuuliyiinta xisbiga WADDANI waxay ku jiraan marxalad qiiq isku qaran ah. Idaacadda Radio Hargeysa ee ay wax ka sheegayaan waa hay’adaha dhifka ah ee aynu qaran ahaan ugu faanno ummadda afsoomaaliga ku hadasha oo dhan,”ayuu yidhi Wasiir Caddaani waxaannu intaas ku daray; “Ninka inta uu TV-ga iska soo fadhiisto oo ina Cirro soo dirayo, Cabdiraxmaan Cirro  waa kii guddoomiyaha baarlamaankanna ahaaye miyaanu fahmin astaamaha qaranka iyo cidda uu madaxweynenimada ka doonayo, miyaanu garanayn in cidda uu madaxtinimada ka doonayaa ay muwaadiniintani (warbaahinta qaranku) ka mid yihiin. Laakiin ma aqbalayno mana yeelayno in shaqaalahayaga wax laga sheego, Ina Cirro ayaanaan ka aqbalaynin kuwa uu soo dirayna kama yeelayno.

Xisbigan fadhiidka ah  ee Cabdiraxmaan Cirro  inuu gurigiisa inan yar  la galo mooyee  ha waajaho adduunka. Kursigii dalka ugu sareeyay ayuu doonayaa waar waxa weeyaan ma u qalantaa oo ma lagugu aaminayaa dalkan?. Waxaanu la dhuudhuumaynayaa wuxuu ogyahay inaanu ka bixi karin dalkan, kuwii u dagaalamayay ee u caytamayey ayaa markay codka timaado ka tagey.”