Masuuliyiintii isaga dambeeyay Wasaaradda Boosaha oo isku haysta gaadhi Shirkadi Wasaaradda ugu deeqday

Hargeysa, 25, May 2012 (SDN)- Wasiirka Boosaha iyo Isgaadhsiinta Somaliland Cali Cilmi Geelle iyo Wasiirkii hore ee Wasaaradaasi Axmed Xaashi Oday ayuu soo kala dhexgalay khilaaf salka ku haya gaadhi Wasaaradda ay Shirkadi ugu deeqday xilligii Wasiirka hore xilka hayay.

Gaadhigan oo noociisu yahay Land-cruser, isla markaana Shirkada SOMCABLE ay ugu deeqday Wasaaradda ayay wararku sheegayaan in Axmed Xaashi Oday uu kaxeystay markii xilka laga qaaday ka dib, taasoo uu Wasiirka cusubna ku wargeliyay inuu soo celiyo gaadhigaas, iyadoo Axmed Xaashina ku gacan saydhay arrintaas, taasoo dhalisay khilaaf dhexmara labadan xubnood.

Waxaanay wararku intaas ku darayaan in Wasiirka Boosuhu Dacwad ka dhan ah Axmed Xaashi u gudbiyay Xeer Ilaalinta Qaranka.

SDN, Hargeisa