Malaayiin Nigerian ah Oo Shirkad Deegaankooda Kharribtay ka Helay Lacago Magdhaw ah
Delta:Jan,07,2015(SDN/QJ)-Inta Badan shacabka ku nool Gobolka Niger Delta ee Dalka Nigeria, ayaa shirkadda Shidaalka ee Shell ka helay malaayiin lacag ah oo magdhaw loo siiyey.
Dadkan, ayaa loo ballan qaaday inay helaan 80 million oo dollar, iyadoo qof waliba lacagtaasi ay gaadhi doonto.
Shirkada Shell ayaa qiratay in ay masuul ka ahayd shidaal ku daatay deegaanka Bodo ee ka tirsan gobalka Niger Delta.
Urur garyaqaano British ah oo logu magacaabo Leigh Day, oo matalaya qowmiyadaasi ayaa kiiskan geeyay maxkamad ku taalla magaalada London.
Kiiskan sharciga ah ayaa noqday mid aad loogu loolamay, maadaama qowmiyad sabool ah oo kaluumeysi ku tiirsan ay dacwad ku oogtay shirkada weyn ee Shell qeybteeda Nigeria.
Kumannaan qof oo ku nool deegaanka Bodo oo uu shidaalka ku daatay ayaa heli doona min 3,000 oo dollar qofkiiba.
Sidoo kale qowmiyada ayaa guud ahaan la siin doonaa 30 million oo dollar oo dheeraad ah.
Shidaalka daatay ayaa saameyn ba’an ku yeeshay beerashada iyo kalluumeysiga deegaankaasi.
Shirkada Shell ayaa dhaleeceyn kala kulantay kooxaha u ololeeyo deegaanka oo sheegay in ay shirkadu qarisay inta uu gaadhsiisan yahay xajmiga shidaalka daatay.
SDN/QJ
Contact@somalidiasporanews.com