Magacyada Dhallinyaro Somaliyeed Oo Maraykanka ku Dhaqan Oo Argagixiso Lagu Soo Oogay
Minneapples:Nov,26,2014(SDN/QJ)-Laba kamid ah Soomaalida deggen Gobolka Minnisota ee Dalka Maraykanka, ayaa lagu soo eedeeyey kiisas argagixiso oo la xidhiidha Xidhiidha dhaw oo ay la leeyihiin Kooxda Daacish.
Ninka Ugu sarreeya Xee Ilaalinta Gobolkaas oo lagu magacaabo Andrew Luger ayaa labadan qof dacwadda kusoo oogay, waxana uu tilmaamay inay jiraan Tuhun ah inay gacan u fidiyeen Kooxda Daacish.
Labada nin ayaa lagu kala magacaabaa Cabdi Maxamuud Nuur oo 20 jir ah iyo Cabdullaahi Yuusuf oo 18 jir ah.
Labada nin ayaa lagu eedeeyey inay shirqooleen inay taageero u fidiyaan urur argaixiso ah gaar ahaan ISIL oo sidoo kale loo yaqaanno magacyada ISIS iyo IS. Cabdi Maxmaudu Nur waxa kale oo uu ku eedaysan yahay inuuba taageerada u fidiyey kooxdaas kadib markii uu ku biiray.
Sida ku cad dacwadda lasoo gudbiyey Cabdullahai Yuusuf waxa uu iibsaday tikidh bishii May ee sannadkan isaga oo qorshaynayey inuu diyaarad ka raaco garoonka diyaaradaha ee Minneapolis una socday dalka Turkiga, waxayna sheegeen inuu tikidhka iibsaday iyadoo aanay waalidkiis ka warqabin inu safrayey.
Waxaa dawcadda ku qoran in Cabdullahai Yuusuf uu xidhiidh la leeyahay qof magaciisa lagu soo gaabiyey H.M oo hore u deganaan jiray Minnesota oo haatana ka dagaalamaya dalka Siiriya. Waxa kaloo lagu sheegay in kaadhka bankiga ee lagu iibiyay tikidhada Cabdullahi Yuusuf iyo H.M. iyo weliba tikidhka qof saddexaad oo u safray markii dambe Siiriya uu isku mid yahay.
Sidoo kale Cabdi Maxamuud Nuur waxay sheegeen inuu dalkan ka baxay bishii May 29 keedii ee sannadkan, iyadoo ay ahayd inuu dalkan kusoo laabto 16-kii Juun balse uu soo laaban waayey.
Waxa la sheegayaa in Cabdi Maxamuud Nuur uuu xidhiidh la sameeyey dad ay ku xidhiidhaan Facebook uuna u sheegay inuu ku biiray “walaalihiisa”. Waxa lagu sheegay inuu sidoo kale xidhiidh la sameeyey Maxamed Cabdullahi Miski oo ka mid ahaa Soomaalida hore u tagtay Soomaaliya ee ku biiray ururka al-Shabab.
SDN/QJ