Magaca Wiil Mudaharaad Ka Dhaliyey Magaalada Laascaanood Oo Muddo La La’aa, Balse Haatan La Helay
Lascanod:Feb,24,2015(SDN/QJ)-Shacabweynaha Reer Laascaanood, ayaa Maalintii shalay Sameeyey Mudaharaad rabshado wata oo ay ku kala xidheen Waddada Halbawlaha ah ee Magaalada Dhexmarta iyo Meherada Ganacsigaba, kadib markii uu Laba Maalmood la la’aa Wiil Magaalada u dhashay oo warar khaldani kasoo baxayeen.
Mudaharaadka ayaa Bilaabmay daqiiqado kadib markii Mukhtaar Faarax Caarshe(astaan) oo ah wiil kasoo jeeda Magaalada Laascaanood la sheegay in lagu dilay Magaalada Caynaba ee Gobolka Saraar.
Shacab arrintaas ka cadhaysan ayaa shalay duhurnimadii iskugu soo baxay Badhtamaha magaalada, waxana soo farogeliyey Ciidamada Booliska iyo kuwa Militeriga oo markii dambe ku guulaystay inay dadkaas kala dareeriyaan Magaalada sideedii hore kusoo celiyaan.
Ma jirto cid soo abaabushay dibadbaxa rabshadaha watay sida ay sheegeen dad goobjooga-yaal ah, waxaase ay degtay rabshadu markii goor-dambe laga helay wiilkii ay rabshadu ka awgiis u dhaceen oo bad-qaba duleedka tuulada Guumeys oo 75-km dhinaca galbeed kaga beegan degmada Laascaanood.
Weli ma cadda sababta keentay in Mukhtaar Faarax Caarshe (Astaan) oo la la’aa muddo laba maalmood ah inuu lumo, waxaase qaar qaraabadiisa ka mid ah ay sheegeen inuu ka baqay ciidan ku sugnaa magaalada Caynabo; isagoo ka yimid dhinaca magaalada Hargeysa kuna soo socday Laascaanood.
Wiilkan oo diifaysan ayaa mar dambe galay Magaalada Laascaanood, waxana wali aan la fahmin sababta keentay inuu ka hadho gaadhigii uu la socday, isla-markaana isticmaalo dariiq kale oo uu Laascaanood ku gaadho.
SDN/QJ
Contact@somalidiasporanews.com