Madaxweyne Siilaanyo oo Shacabka Somaliland Ka Tacsiyadeeyay Agaasime Guud oo Taariikh Dheer Ku Lahaa Halgankii Xoraynta Waddanka oo Hindiya Ku Geeriyooday

Hargaysa 31. March 2017 (SDN/QJ):-Madaxweynaha Jamhuuriyadda Somaliland, Mudane, Axmed Maxamed Silaanyo Isagoo ku hadlaya magaciisa, ka dawladda iyo kan shacbiga Somaliland, waxa uu tacsi u dirayaa, aqoonyahanka, waxgaradka, waayeelka, qoyskii, eheladii, qaraabadii, asxaabtii iyo shacbiga Somaliland ee uu ka baxay Alle ha u naxariistee Agaasimihii guud ee wasaaradda Gashaandhiga Somaliland, Marxuum Mujaahid Cabdikariim Xaashi Cilmi oo caawa (30/03/2017) ku geeriyooday Dalka Hindia oo uu xaalad caafimaad u joogay marxuumku maalmahan.

Madaxweynuhu waxa uu marxuumka ku sifeeyey udub dhexaad ka baxay shacbiga iyo qaranka Somaliland, kuna suntan taariikhda halgamadii kala duwanaa ee loo soo maray madaxbanaanida Qarannimada Jamhuuriyadda Somaliland, waxaanu ka mid ahaa odayaashii qaybta libaax ka qaatay dib u dhiskii iyo nabad kuwada noolaanshaha shacbiga Somaliland, waxaanu xilal muhiima ka soo qabtay qaranka Somaliland, wakhtigan uu geeriyoodayna qaranka u  hayey xilka Agaasimihii guud ee wasaaradda gashaandhiga Somaliland.

Madaxweynuhu waxa uu marxuumka ALLE uga baryayaa inuu naxariistii janno ka waraabiyo Ciidamada qaranka, aqoonyahanka, waxgaradka, waayeelka,  qoyskii, qaraabadii, eheladii, asxaabtii iyo Shacbiga Somaliland ee uu ka baxayna samir iyo iimaan saadiqa ka siiyo. Aamiin Aamiin Aamiin…

 

IN-NAA LILLAAHI WA IN-NAA ILAYHI RAAJICUUN

    Xuseen Aadan Cige (Deyr)

Af-hayeenka Madaxtooyada JSL.