Madaxweyne Siilaanyo oo Markii Kowaad Xuska Aasaaska Ciidanka Qaranka kaga qayb galay Fadhiisinka Deegaanka Oog,Kana Hadlay Is Khaarajinta Ciidamadda Iyo Xalka uu Soo Jeedinayo DAAWO

Oog 2. 2, February,2015(SDN/QJ):-Madaxweynaha JSL Md Axmed Maxamed maxamuud Siilaanyo iyo weftigii balaadhnaa ee uu hogaaminayey ee socdaalka hawleed ku marayey gobolada Bari ayaa maanta ka qayb galay xuska sanadguurada 22-aad ee  aasaaskii Ciidanka qaranka JSL oo lagu qabtay Saldhiga taliska Bari ee Ciidanka qaranka oo ku yaalla Degmada OOG ee gobolka Saraar.

Munaasabadda xuska sanadguurada ciidanka oo ay ka soo qaybgaleen inta badan saraakiisha sare ee Ciidamada Qalabka sida, xubno ka tirsan golaha wasiirada, xildhibaano ka mid ah labada gole baarlamaan, Gudoomiyaha Maxkamadda sare iyo  madaxda xisbiyada siyaasadda ayaa waxaa warbixin ku saabsan Xaalada Ciidamada Qaranka ka jeediyey Sareeye Gaas Ismaaciil Maxamed Cismaan Shaqalle taliyaha ciidanka Qaranka

 

Intaa ka dibna wasiirka wasaaradda gaashaandhiga MD Axmed Xaaji cali cadami ayaa xusay muhiimada aya ciidamada qaranku u leeyihiin ammaanka xuduudaha dalka.

 

Madaxweynaha JSL Md Axmed Maxamed Maxamuud Siilaanyo oo hadal dheer oo qiimo leh ka jeediyey munaasabada xuska sanadguurada 22-aad ee aasaaska ciidanka qaranka ayaa Waxaa Khudbadiisii ay u dhignayd Sidan:-

“Milgo iyo maamuus weyn bay ii tahay maanta in aan ka soo qayb-galo Xuska Sannad Guurada 22aad ee Aasaaska Ciidanka Qaranka Jamhuuriyadda Somaliland.

 

Aniga oo ka faa’iidaysanaya madashan iyo munaasibadan taariikhiga ah, waxaan jecelahay inaan hambalyo iyo bogaadin balaadhan hawada u mariyo cutubyada kala duwan ee Ciidanka Qaranka Madax iyo Minjo.

 

Mar kale, munaasibadan awgeed waxaan hambalyo u dirayaa Qoysaska Ciidanka Qaranka iyo guud ahaan Shacbi-weynaha Somaliland.

 

Waxaan hambalyo iyo bogaadin u dirayaa hal-doorkii u kala danbeeyey hal abuurka iyo hogaaminta Ciidanka Qaranka, ragaas oo ay ka mid yihiin:

 

1. Mudane, Xasan Cali Abokor, Taliyihii u horreeyey ee Aasaasay Ciidanka Qaranka.

 

2. Mudane, Cismaan Cawed Xaashi (Cismaan Dacas).

 

3. Mudane, Xasan Yoonis Habane, ilaahay ha u naxariisto.

 

4. Mudane, Cabdi-samad X. Cabdillaahi (Gamgam).

 

5. Mudane, Nuux Ismaaciil Taani

 

6. Mudane, Maxamed Xasan Cabdillaahi (Jidhif).

 

7. Mudane, Ismaaciil Maxamed Cismaan (Shaqale).

 

Waxaan u ducaynayaa dhammaanba geesiyaashii u shahiiday Difaaca Qadiyadda Qarannimada Somaliland, waxaanan ilaahay uga baryayaa inuu denbi dhaaf siiyo, naxariista janadana ka waraabiyo.

Duco Qabayaal

Qaran aan ciidan iyo cudud adag lahayni, cadaw iskama caabiyi karo, wuxuuna ka dhigan yahay ruux curyaan ah oo aan haba yaraatee cago lahayn.

 

Cuudka, Caqliga iyo Cududa Milateri, waa cawada iyo ayaanka uu maanta caalamku is-dheer-yahay. Sidaa darteed, waa ilaahay mahadii in uu ciidankeenu gaamuray oo laba iyo labaatan gu oo gaw ah uu baarka ka gooyey.

 

Shaki kuma jiro mudaddaa dheer in uu tisqaaday aqoon ahaan, agab ahaan, tiro ahaan iyo tayo ahaanba.

 

Ujeedada Ciidanka Qaranka loo abuuray ma’aha in bulshada loogu caga-jugleeyo ama lagu cabudhiyo. Hase yeeshee, waxa loogu talo galay in ay sugaan amaanka dadka, isla markaana difaacaan cadaw kasta oo ku soo duula Dalkeena Hooyo.

 

Arrintaas waxaa markhaati ma doon u ah goob kasta oo ay Ciidanka Qaranku ka hawlgalaan min Bari ilaa Galbeed waxa ka suurtagashay nabad waarta iyo nolol wanaagsan.

Miyaanay ahayn wax lagu farxo ama lagu faano awoodda, aqoonta, anshaxa iyo asluubta wanaagsan ee Ciidamada Qaranka meel kasta oo ay joogaan maanta lagu majeerto.

Duco Qabayaal

 

Waxaan idin leeyahay Shacbiga aad ciidanka u tihiin caad kama saarna xilka culus ee aad u haysaan.

 

• Waxaa hubaal ah in aad nafihiina u hurtaan difaaca Dalkiina Hooyo.

 

• Waxaa hubaal ah in aad heegan ugu jirtaan habeen iyo maalin ilaalinta amniga iyo adkaynta nabadgelyada ummaddiina.

 

• Waxa hubaal ah in aad si hufan u gudateen xilkii iyo waajibkii idinku beegnaa.

 

HAMBALYO   HAMBALYO   HAMBALYO

Duco Qabayaal

In kasta oo aynu xaqiijinay guulaha waaweyn ee aan soo sheegay, hadana uma jeedo in aanay jirin qabyo ama ay wax kastaa inoo dhan yihiin, hore ayaa loo yidhi:

 

Shaqo Dawladeed Ma Dhamaato, ee Ninkeeda ayaa Dhammaada

 

Sidaa darteed, waxaan idinku boorinayaa in aad dedaalkiinii hore laban-laabtaan, isla markaana feejigo iyo fiiro dheer u yeelataan cid kasta oo doonaysa in ay khal-khal geliso degenaanshaha iyo xasiloonida dalka.

 

Dhinaca kale, waxaan idiinka digayaa  in aad ku milantaan loolanka iyo laacdanka siyaasadda, taas oo ah mihnad iyo meherad rag kale leeyahay.

 

Waxaan  idinka waaninayaa Qabyaaladda iyo Qaadka oo aan ku tilmaami karo in ay yihiin Aafo Qaran.

 

Waxaan jecelahay in aad ka faa’iidaysataan  Qorshayaasha Waxbarashada kala duwan  ee Wasaaradda Gaashaandhigu idiin diyaarisay  xilliyada aad firaaqada tihiin, taas oo loogu talo-galay in kor loogu qaado aqoontiina, isla markaana la idinkaga mashquuliyo boholyowga balwadaha  iyo wixii la mid ah.

Duco Qabayaal

 

Beryahan danbe waxa soo batay dilalka Ciidanka Qaranka dhexdiisa, gaar ahaan dilka Saraakiisha.

 

Arrintani waa denbi iyo dhaqan fool xun oo aan loo dulqaadan Karin, waxaan u cadaynayaa in cid kasta oo geysata dil sharci-darro ah in cadaaladda la horkeeni doono, cawaaqibka ay leedahayna la dhadhansiin doono.

 

Intaas waxa dheer, toddobaadka soo socda insha Allah, waxaan magacaabi doonaa Guddi Kooban oo baadhis qoto dheer ku soo samaysa sabaha abuuray ama dhiiri-geliyey dilalka Ciidammada dhexdooda.

 

Duco Qabayaal

 

Xukuumadda aan madaxda ka ahay, waxay ku talaabsatay wax-qabad iyo horumar weyn oo ku aadan sidii kor loogu qaadi lahaa awoodda iyo haybadda Ciidamada Qaranka.

 

Sida aad wada ogtihiin waxaannu kordhinay mushaharkii 130% laba jeer oo isku dhaw.

 

Ka dib 19 sanno markii uu sinnaa Subeehiga iyo Sarkaalka Ciidanka Jamhuuriyadda Somaliland, waxaannu ku dhiiranay bixinta derajada garbihiina ku xardhan.

 

Waxaannu u samaynay gunno dheeraad ah, gaar ahaan ciidamada jiidaha hore, gunnadaas oo dhan Askarigiiba 100,000 Somaliland Shilin.

 

Mar labaad, waxaan amray sannadkan 2016 in gunnadii aad u bixiseen geed fuulka loogu daro Askari kasta oo ka hawlgala jiidaha hore 180,000 Somaliland Shilin, taas oo ka bilaabmaysa bishan January ee dhamaatay.

 

Duco Qabayaal

 

Xukuumadayda waxa ka go’an dedaalada ay ku xoojinayso dhismaha, awoodda iyo niyadda Ciidamada Qarankan.

 

Sidaas darteed, waxaan idin leeyahay AMBA FAYDNIYE, WAXBA HA I FARIN ee ku niyad samaada, sabir, dulqaad, iyo dedaal.    isku duubni iyo adkaysina ogaada

 

Alahayow …………. Alahayow

Ciidanka Qaranku Ha Guulaysto

Somaliland Ha Guulaysato