Madaxweyne Siilaanyo oo Caawa ka qayb gelaya munaasibad lagu xusayo Saddex sano Guuradii ka soo wareegtay Xukuumadiisa

Hargeysa :28-july-2013(SDN)Madaxweynaha Somaliland mudane  siilaanyo ayaa caawa Mansor hutel kaga qaybgelaya xaflad  ballaadhan  ay xukuumaddiisu ugu talo gashay inay ku soo bandhigto Guulihii ay gaadhay muddadii saddexda sano ahayd ee ay jirtay iyo waliba caqabadaha ka taagan hirgelinta Ballanqaadyadii ay hore u sheegatay.

 

Munaasibaddan, ayaa sidoo kale waxa ka soo qaybgeli doona Wasiirro tiro badan oo xukuumadda ka tirsan, qurbo-joog, xubno  ka tirsan aqalada Guurtida iyo wakiilada iyo marti sharaf kale oo aad u tiro badan.

 

Iyadoo Guud ahaanba la adkeeyey Ammaanka Caasimadda Somaliland, ayaa waxa si weyn loo filayaa inuu madaxweyne siilaanyo wax ka iiftiimiyo waxa ka qabsoomay ballamihii xukuumaddiisu gashay xilligii ay mucaaradka ahayd iyo waliba turaanturrooyinka illaa haatan ka haysta xukuumaddiisa inay taabo geliso ballamaheedii sida weyn looga sugayo.

 

 

Sidoo kale waxa la filayaa inay halkaa ka hadlaan qaar ka mid qurbejoogga reer Somaliland ee xukuumadda sida weyn gacanta u siiya, iyadoo sidoo kale la filayo inay hadlaan xubno wasiirro, baarlamaan iyo Guurti isugu jiraa.

Somalidiasporanews.com

Axmed Cumar Axmed (timo)

Hargeysa somaliland.

Mawliidguure@yahoo.com