Madaxweyne Siilaanyo Dalka Kaga Baxaya Safar Uu Kaga Galgalanayo Go’doonka Siyaasadeed ee Dalku Galay Muddooyinkan
Hargeysa:July,05,2014(SDN/QJ)-Warar xogogaal ah oo laga helayo Madaxtooyada somaliland ayaa sheegaya in madaxweyne Siilaanyo Dhawaan safar ugu bixi doono Dalalka Engiriiska iyo Ethiopia.
Wararka ayaa intaas ku daray in Madaxweynuhu ka hor safarkiisa London sii mari doono magaalada Addis Ababa ee wadanka Itoobiya, waxaana laga yaabaa sida ay wararku sheegayan inuu Addis Ababa kula sii kulmo madaxda sare ee dawladda Itoobiya, iyadoo la ogyahay inuu arrimo amni u xidhanyahay xuduudka u dhexeeya Somaliland iyo Itoobiya.
Waxaana la filayaa in Madaxweyne Siilaanyo ku dedaalo inuu Itoobiya ku qanciyo in la furo xadka labada wadan ee xidhan.
Dhinaca Ingiriiska, waxa ay wararka qaar sheegayaan inuu safarkiisu yahay mid shakhsi, waxase la filayaa inuu magaalada London kulamo kula yeesho masuuliyiin ka tirsan dawladda Ingiriiska, iyadoo uu Ingiriisku hormuud u ahaa baaqii dhawaan ka dhanka ahaa Somaliland ee ka soo baxay wadamada Ingiriiska, Maraykanka iyo ururka Midowga Yurub.
Arrimahan iyo kuwo kale ayaa iyana la filayaa inuu kala hadlo masuuliyiinta uu kala kulmo dawladda Ingiriis oo uu xidhiidh soo jireen ahi ka dhexeeyo Jamhuuriyadda Somaliland.
Socdaalkan Madaxweynaha ayaa wuxuu ku soo beegmayaa wakhti ay dad badani aaminsanyihiin inuu gaabis ku yimid xidhiidhkii Somaliland ay lahayd beesha caalamka, gaar ahaan wadamada jaarka iyo wadanka Ingiriiska.
Xadka Itoobiya ay la wadaagto Somaliland, ayaa sida ay dawladda Somaliland xaqiijisay wuxuu u xidhanyahay arrimo nabadgelyo.Waxaanay xisbiyada mucaaradku ku eedeeyaan Madaxweyne Siilaanyo iyo xukuumadiisa inay ka gaabisay xoojinta xidhiidka dibadda, laakiin xukumadda ayaa si adag u difaacda siyaasadeeda arrimaha dibadda.
SDN/QJ
Contact@somalidiasporanews.com